Ngano nga Visayas ra man?

Nahibulong gyud ko ngano nga ang isyu kabahin sa mga drug lord nga gihimoan na gani og imbestigasyon sa Senado ug Kongreso, pulos man taga Visayas. Ayaw ko'g ingna nga walay drug lord didto sa ubang bahin sa nasud, ilabi na sa Luzon?

Nakahinumdom ko nga may langyaw man gani nga napatay sa kapolisan dihang gironda nila ang usa ka buhatanan og shabu didto sa Luzon. Dili ko motuo nga ang daghang drug lord ania ra dinhi sa Visayas.

Paniid nako, mora og naundang man ang pagpamatay sa mga tawo nga nalambigit  sa illegal nga drugas didto sa ubang mga dapit sa nasud. Pero dinhi sa atong rehiyon, walay hunong ang pagpamatay sa mga drug pushers.

Para nako, dili angay'ng kaluy-on kining maong mga tawo nga bisan og nasayod na nga hugtanay na ang kampanya sa kagamhanan batok sa gidiling drugas, dili gayud mohunong.

Sa ato pa, gipangita gayud nila ang ilang kamatayon kay kon masakpan na sa mga polis, mosukol man. Sa paghilak ni PNP Chief Ronald Dela Rosa atubangan sa mga senador kaniadtong Miyerkules, akong nahuna-huna nga mora'g seryoso diay tingali si Dela Rosa nga masumpo gyud ang drugas.

Unsaon pagsumpo nga daghan pa man kaayo ang kapolisan nga nalambigit sa sindikato sa mga tigpayuhot og drugas. Ang uban sa gipangpatay klaro nga gituyo aron dili mabutyag ang ilang kalambigitan sa drugas.

Pastilan, kon wala pa mahimong presidente si Rodrigo Duterte ug lain nga hepe sa kapolisan ang iyang gitudlo, makapanglingo-lingo ta kon unsa kaha ang dangatan sa atong nasud. 

***

Gamay ra kuno ang buhis nga gibayran sa SM Prime Holdings Corporation kabahin sa 30 ka hektareyang kayutaan nga napalit nila diha sa South Road Properties ug gipatukoran nila og higante nga tindahan.   

Nagtuo si Mayor Tomas Osmeña nga gitikasan sa SM ang dakbayan sa Sugbo kay mibayad lang sila og P14 milyones nga real property tax, imbes nga P37 milyones unta, base sa kuwentada sa mga sinaligan sa mayor.

Kini maoy nakaaghat ni Osmeña nga si Hans Sy ug ang mga opisyal sa iyang korporasyon gipasakaan niya og kaso nga tax evasion didto sa Cebu City Prosecutor's Office kaniadtong Miyerkules.

Apan adunay usa ka opisyal sa SM nga mitug-an kanako nga ang gibayran nila nga real property tax gibase kini sa assessed value sa property. Sa ato pa, kon dako pa ang assessed value, dako usab unta ang ilang gibayran nga buhis.

Kon tuohan nimo ang pamahayag sa mao nga opisyal sa SM, maora'g masabtan nimo nga andam sila nga mobayad base sa assessed value gikan sa city assessor's office.

Angay kini nga tan-awon pag-ayo ni Mayor Tommy kay dili imposible nga gituyo ang pagpagamay sa assessed value sa property sa SM aron  nga gamay ra usab ang buhis nga ilang mabayran.

Apan yuna pa, nganong buhaton man kini sa mga kawani sa city hall? Dili diay sila gusto nga dako ang kantidad sa buhis nga makolekta sa dakbayan aron magamit pagsweldo kanila ug magasto sa mga proyekto?

Ang pag-ingon nako nga angay'ng tan-awon kini pag-ayo ni Tommy tungod kay dili baya imposible nga adunay mga bilyako nga kawani sa assessor's office nga motuyo pagpagamay sa bayranan, apan adunay "cashabutan."

Sa press conference kagahapon, gibutyag na usab ni Tommy nga usa ka kompaniya og mga bangko maoy sunod niya nga target nga pasakaan og kaso nga tax evasion.

Angay'ng paluyohan si Tommy niining maong lakang niya paggukod sa mga kompaniya nga dili mobayad og tukma nga kantidad sa buhis. Ang SM hinoon motugyan niining kasoha sa ilang tax division aron katun-an ang kaso nga gipasaka batok kanila.

Atong paabuton ug hatagan nato usa og "benefit of the doubt" ang SM, apan kon masuta nga sila sad-an, adunay balaod nga mopahamtang kanila og silot.

[email protected].