Pagbisto ug pagbakwi
Tungod sa travel advisory sa US Embassy batok sa habagatang Sugbo, atong subayon ang pasiunang kasayuran sa giingong presensiya sa mga sakop sa Abu Sayyaf sa Sugbo nga gituohan nga maoy gipasikaran sa Amerikanhong gobyerno sa pagpahimangno sa ilang katawhan nga mosuroy sa mga lungsod gikan sa Dalaguete paingon sa Santander.
Ang kasayuran wa maggikan sa iresponsable nga texters o users sa social media nga way lingaw kon dili gikan sa kadagkoan sa Philippine National Police. Gikasab-an na hinuon ni PNP Director General Bato dela Rosa ang tinubdan sa kasayuran nga gihulagway nga hilaw pa, kinahanglan pa untang susihon ug di unta angay nga isulti dayon sa publiko kay makamugna lang og wa kinahanglana nga pagka alarma.
***
Niang di malalis nga kutay sa pagkabutyag sa kasayuran:
Oktubre 23, Dominggo, si Supt. Julian Entoma, hepe sa Regional Intelligence Division sa Police Regional Office sa Central Visayas, nipahibawo sa media nga niabot sa Sugbo niadtong Biyernes, Oktubre 21, ang mga sakop sa Abu Sayyaf nga gipangulohan ni Kumander Al Habsi Misaya; ug
Oktubre 24, Lunes, gibutyag ni Chief Supt. Noli Taliño, Region 7 director, nga nahibaw-an nila gikan sa Anti-Kidnapping Group sa PNP nga ang mga bandido nibiya sa Dapitan, niadto sa Negros Oriental, nitabok sa Sugbo ug nibiya na sa pagka Dominggo, Oktubre 23.
***
Si dela Rosa mismo wa katabang pagpakalma sa katawhan dihang iyang gibutyag nga nakaabot nang mga sakop sa Abu Sayyaf di lang sa Sugbo kon dili hasta sab sa Metro Manila. Matod niya niadto ra silang nakadawat sa kasayuran nga ang mga bandido magtagsa-tagsa paggawas sa Mindanao ug pagsuroy sa nagkalainlaing bahin sa nasud. Gitataw hinuon niya nga di angayng ibisto sa publiko ang wa pa masusing kasayuran.
Human gisukmatan ni dela Rosa, ang hepe sa AKG nga si Senior Supt. Manolo Ozaeta niangkon nga hilaw pang kasayuran ug di unta angayng isaba sa publiko. Matod niya nga ilang natino nga nahibalik na sa Mindanao ang mga sakop sa Abu Sayyaf.
***
Human nakabantay sa dako niyang bulilyaso, gidalidali pagbakwi ni Entoma ang kasayuran. Matod niya di diay tinuod nga nakaabot sa Sugbo ang Abu Sayyaf. Gikutlo niyang mga lider sa Muslim community sa Sugbo nga nihimakak sa bisan unsang presensiya sa mga bandido.
Apan uwahi nang tanan. Nahinayak nang US Embassy pagluwat sa travel advisory. Wa na tingali kabantay sa nisunod nga pagbakwi sa kasayuran. O tingali nakakuha ang mga Amerikanhon og ilang kaugalingong kasayuran nga mas makapaalarma kay sa gibutyag sa kapolisan. O tingali, tungod sa panagsungi sa kadagkoan sa Pilipinas ug Estados Unidos, mahimong nasakripisyo ang pagsaw-anay nila sa mahinungdanong intelligence information. Mao nay mas makapaalarma.
- Latest
