Dili kawatan, dili corrupt

Adunay binayran nga advertisement nga gibalik-balik pagpabati sa mga radyo ug telebisyon. Sa mao nga advertisement, si Mar Roxas igo lang miingon nga dili siya kawatan ug dili siya corrupt.

Wala gisulti ni Roxas kon may gipadungog-dungog ba siya sa mao nga advertisement. Apan ingon sa gisakitan diay kuno ang kampo ni Vice President Jejomar Binay.

Pareho nga kandidato pagka presidente sila si Roxas ug Binay. Ngano nga masakitan man ang kampo ni Binay sa mao nga advertisement?

Igo ra man si Roxas nga mitataw nga dili siya corrupt nga pagkatawo ug dili siya kawatan sa kuwarta sa gobiyerno?

Kun ganahan ang kampo ni Binay, pahimoan usab nila og advertisement si Binay aron ipabati usab sa radyo ug telebisyon nga dili siya kawatan ug dili siya corrupt.

Niana, ang katawhan na ang mohukom kon kinsa kanila ni Roxas ug Binay ang tuohan sa katawhan. Wala man malilong sa katawhan nga si Binay nag-atubang og kasong kurapsyon sa Ombudsman.

Ang anak usab ni Binay nga mayor sa Makati City gitaktak sa katungdanan tungod sa matud pa "overpricing" sa pagpatukod sa Makati City parking building ug ubang proyekto.

* * *

Naisyu na usab ang kampo ni Binay kay ang iyang mga supporters nagbutang og banner didto sa SRP nga "Binay Country" aron makita gayud sa mga mitambong sa santos nga misa kaniadtong Domingo.

Daghan ang nangyamiid niini. Ngano gud tawon nga tawgon man ang Sugbo og Binay Country? Aw, mahibaw-an ra bitaw na unya sa eleksyon.

Apan dili ra diay ang mga alyado ni Binay ang mihimo og abuso sa ilang propaganda materials. Bisan na diay ang Liberal Party diha sa Mandaue City.

Ang mga alyado sa LP nga gipangulohan nila ni Mayor Jonas Cortes ug Kongresista Luigi Quisumbing namutang usab og mga propaganda materials sa mga waiting shed sa Mandaue nga adunay hulagway ug ngalan sa ilang kandidato.

Pagka wala'y uwaw. Tangtanga na ninyo uy! Maayo na lang kay dinhi sa dakbayan sa Sugbo, adunay kamandoan si Acting Mayor Edgardo Labella nga tangtangon ang mga propaganda materials sa mga kandidato, apil na sa Team Rama.

* * *

Kon init man ang eleksyon dinhi sa dakbayan sa Sugbo, mas init pa gyud diay sa Mandaue. Tiaw mo nga ang kampo ni Jonas ug Luigi mihimo'g paagi nga mapahigayon gyud ang eleksyon sa mga senior citizens sa lainlaing barangay sa Mandaue.

Klaro kaayo ang ilang tumong nga gipaninguha nila nga ang modaog nga presidente sa kahugpongan sa mga senior citizens, ilang kaalyado.   Gihimo nila kini ni Jonas kay natan-aw man niya nga mura'g dehado siya ni Dr. Paulus Cañete pagka kongresista sa ika-unom nga distrito ug si Luigi, klaro man nga walay dag-anan ni Konsehal Lolypop Ouano-Dizon pagka mayor.

Dinhi sa dakbayan sa Sugbo, adunay grupo sa mga senior citizens nga klaro kaayo nga atua midapig sa Team Rama, apan ang uban usab nga senior citizens, nagpakahilom lang apan tua gihapon ni kanhi mayor Tomas Osmeña.

Dili na ikahibulong nga hugopan kanunay sa katawhan si Lolypop kon mosuroy sa kabarangayan kay ang mga Ouano dugay na kaayo nga nagserbisyo sa Mandaue.

Labaw na nga nakabentaha si Lolypop kay ang mga drayber ug tag-iya sa mga tricycle nahadlok nga kon si Luigi makadaog, wad-on na ang mga tricycle kay multicab na ang padaganon.

Si Paulus Cañete sab paborito sa taga Consolacion ug Cordova kay ang mga nagpuyo sa duha ka lungsod nahiubos ni Jonas tungod sa iyang pamahayag nga kon siya mahimong kongresista, ang Mandaue himoon niya nga "lone district."

Kon mahitabo kini, asa na man tawon nga distrito magpasakop ang Consolacion ug Cordova? Diha nasipyat si Jonas. Gusto unta ko nga mo-interview kaniya kabahin niini, apan ambot nganong mahadlok man si Jonas magpa-interview.

Mao ba kana ang matang sa tawo nga mangambisyon nga mag-kongresista? Dili kaha ka masakop lang sa "Committee on Silence" didto sa Kongreso sir?