51st International Eucharistic Congress
Mahimo ra gyod untang manghangyo silang Cebu Archbishop Jose Palma ug ubang mga tigpasiugda sa 51st International Eucharistic Congress sa pagpangayo og mas daghang pabor gikan sa gobyerno ug pribadong sektor alang sa kasayon sa kaliboan ka lokal ug langyawng mga delegado gikan sa mga parokya sa Pilipinas ug 71 ka ubang kanasuran sa usa ka semana nga kalibotanong kalihokan.
Apan wa sila magpatuyang. Labihan nila kamapanagan-on nga ang lokal ug nasudnong mga opisyal sa gobyerno mao pa gani hinuon ang nanghagad sa paghatag nila og dugang. Dinasig sa pag-insistir ni Pope Francis nga ang Simbahang Katoliko magpabiling yano ug moalagad sa labing kabos, wa magkara-kara ang mga tigpasiugda sa kakuwang sa natigom nga pundo alang sa daghan ug dagko uyamot nilang gastohan.
***
Mahimo ra gyod untang manghangyo silang Palma ug kaubanan nga tak-opan ang tibuok St. John Paul Avenue (kanhi Juan Luna, kanhi San Jose dela Montaña) aron nga mas hapsay ug mas luwas ang pagsud-gawas sa mga delegado sa IEC Pavilion nga maoy pahigayonan sa kalibotanong kongreso sugod karong adlawa hangtod sa Biyernes.
Apan kabahin ra sa dan ang ilang gipatak-opan, gikan sa eskina sa Technical Education and Skills Development Authority (TESDA) hangtod sa eskina Cardinal Rosales Avenue, ug sud ra sa upat ka oras sa buntag (alas-5 hangtod sa alas-9) ug lima ra ka oras sa hapon (alas-2 sa hapon hangtod sa alas-7 sa gabii).
***
Hinaot nga makat-on gikan sa mga tigpasiugda sa IEC ang mga tagduma sa umaabot nga kalibotanong kalihokan sa Sugbo ug ubang bahin sa nasud. Nga wa maghunahuna sa dakong epekto sa patuyang nilang pagtak-op sa kadalanan nangaging mga tigom sa Asia Pacific Economic Cooperation sa niaging tuig ug Association of Southeast Asian Nation Summit niadtong 2007.
Labing mahinungdanong leksiyon nga nahatag sa IEC mao nga gawas nga gisalikway ang naandang pagpanghipos sa kabataan sa kadalanan gipangitaan pa gyod og paagi nga makaapil sila isip kabahin sa kaliboan nga mangalawat sa labing unang higayon atol sa IEC.
***
Ang kamanggihunahunaon sa kadagkoan sa simbahan di hinuon garantiya nga di mahasol ang trapiko sa Metro Cebu tungod sa dagkong kalihokan sa IEC hangtod sa Enero 31. Maong nanghangyo nang daan ang Artsidyosesis sa Sugbo sa pagsabot sa mga Sugbuanon kansang mga lakaw, pag-eskuyla ug panginabuhi maoy labing maapektahan.
Mas gaan nga himuon ang mga sakripisyo tungod sa kasayuran nga gipaningkamotan sa mga tigpasiugda nga labing gamay nga kahasol ang mamugna sa higanteng kalihokan. Mas epektibo ang kamapaubsanon kay sa pagwara-wara nga dakong pribilehiyo ang pagpahigayon sa kalihokan dinhi ug busa kon mahimo mohunong una ta og ginhawa aron nga mobilib ang lokal ug langyawng mga delegado.
- Latest
