Adik o kugihan lang?
Hagbay ra kong nakadungog sa mga pasangil nga nagbisyo sa ilegal nga drugas si Cebu City Mayor Mike Rama. Apan gisalikway nako nga kabahin lang sa naandan nga sinabligay og lapok sa politika. Apan ang mga namasangil nitumbok sa morang way katulganay nga estilo sa liderato ni Rama nga ebidensiya nga dunay sekreto ang talagsaon niyang lahutay.
Way gipadulngan ang mga huhungihong. Way bisan usa nga nakapresentar og ebidensiya batok ni Rama. Labi nang nakaplagang negatibo si Rama sa drug test nga gipahigayon sa Cebu Office for Substance Abuse Prevention (COSAP). Pila ka adlaw human pasanginli si Rama nga nibalibad sa surprisa nga drug test.
***
Nakatabang pagsagang sa pasangil nga adik sa drugas si Rama ang findings sa COSAP. Kay ang tagduma, si Dr. Alice Utlang, di itoy ni Rama. Gani iyang gitangtang pagka Cebu City Veterinarian human ni-walkout uban sa pipila ka department heads dihang giawhag ni Rama ang mga di kapaluyo sa iyang kampanya alang sa ikaduhang termino sa paggawas gikan sa tigom.
Negatibo gihapon si Rama sa ikaduhang drug test uban nilang Bise Mayor Edgar Labella ug ubang kadagkoan sa City Hall. Di hinuon katabang ni Rama ang pangangkon nga siya ang niboluntaryo. Kay mapreserbar lang ang kaligdong sa drug tests kon tinuod nga random, o kinalit, nga way panahon ang pasyente pagpangandam ug paglimpiyo sa iyang sistema.
***
Nisibaw pagbalik ang mga pasangil batok ni Rama dihang akong gimantala sa Facebook ang among hulagway nga nangaon og taho samtang nanglakaw sa Salinas Drive sa Barangay Lahug niadtong Septiyembre. Pipila sa mga nikomentaryo nipadayag og kakugang sa kadaot ug katiguwang nang tan-awon ni Rama.
Mangahas ko og pangagpas nga tingali daot kaayo si Rama nga tan-awon tapad nako kay nidako nang akong tiyan. O tingali mora siyang tiguwang na kaayo tungod sa tulo ka oras namong baktas gikan sa eskina Gorordo ug Maxilom sangko sa eskina Salinas ug Archbishop Reyes.
***
Apan duna koy gamayng ikumpisal. Sa tungatunga sa among baktas, gikapoy na ming taga DYAB--nga naglakip nilang JT Benz ug Edison delos Angeles--ug nisugyot ni Rama nga kutob na lang mi sa tungod sa simbahan sa Mormons. Apan niinsistir si Rama nga daghan pa siyang ipakita namo sa Salinas hangtod sa rehiyonal nga buhatan sa TESDA.
Mas baskog ug mas kugihan ba lang gyod si Rama? O tinuod siyang may laing hinungdan ang talagsaong lahutay nga maoy unang manglamano sa kadlawon maoy uwahing mohunong og pangampanya dayong tungang gabii, usahay gani maabtan sa sunod kadlawon? Di katabang ni Rama ang iyang sinultihan nga dugayng mahuman ug tagsa rang makatunong. Mahimong itugyan sa mga botante ang paghukom niya. O mopaubos sa drug test nga di siyay magbuot kanus-a.
- Latest
