Alas ni PNoy
Hapit ko masud-ipi sa akong kape pagkabati sa diskurso ni Presidente Noynoy Aquino atubangan sa mga delegado sa Asia Pacific Economic Conference nga naghisgot na sab sa mga pangurakot sa gipulihan niyang pamunoan. Kanus-a man niya papahuwaya ang iyang mga kaatbang?
Wa siya maghisgot og mga ngan apan klarong iyang gipasabot silang kanhi presidente Gloria Macapagal-Arroyo, nga hangtod karon padayon pang natanggong sa Veterans Memorial Medical Center, kanhi chief justice Renato Corona, nga napalagpot pinaagi sa impeachment, ug ang tulo ka senador nga silang Juan Ponce Enrile, Jinggoy Estrada ug Bong Revilla nga pulos napriso tungod sa pork barrel scandal (nakapiyansa na hinuon si Enrile karong bag-o).
***
Apan pagkabati nako sa pakigpung ni Presidente Michelle Bachelet sa Chile, nga nihinumdom sa iyang kaugalingong kasinatian sa diktadura ni Augusto Pinochet ug giunsa pagkat-on og pagtulon-an sa katawhan ug pag-angkon og responsibilidad sa pagpalig-on sa demokratikanhong mga institusyon ug pagpasiugda og kausaban alang sa kalamboan, nakasabot ko sa pagpahinumdom ni Aquino sa tanang maminaw unsay iyang nahimo.
Nipasidaan ang atong katiguwangan nga di tang kaabot sa atong padulngan kon di molingi sa atong gigikanan. Di ta hingpit nga makakat-on sa mga pagtulon-an sa tiningob nga kasinatian sa nasud ug sa katawhan kon magpili lang unsang bahina sa kasaysayan ang atong hinumdoman.
***
Kon lingion ang nangaging lima ka tuig sa pamunoang Aquino, ang labing lahi nga butang nga iyang nahimo mao ang wa pagpangawat. Wa pa hingpit nga mabadlong ang pangurakot sa tanang ahensiya sa gobyerno, apan way makatulisok ni Aquino nga nibolsa sa buhis sa katawhan.
Gibasura sa Korte Suprema ang Disbursement Acceleration Program di tungod sa pangurakot o mga proyektong wa igkita kon dili tungod sa lahi nga hubad sa Malakanyang sa savings ug sa labing dinaliang mga proyekto nga kinahanglang gastohan. Kapasanginlan si Aquino nga iyang mga kaatbang ray gipanggukod, apan di siya kapasanginlan nga nipaburot sa iyang bolsa.
***
Nga mao say labing dako niyang bentaha. Wa siya mopasiugda og radikal nga ekonomikanhong mga programa. Di makapangangkon ang iyang gabinete nga mas utokan kay sa ilang gipulihan. Gani, ang gipasigarbo nga Panawid Pamilyang Pilipino Program (4Ps) nasunod ra niya sa pamunoang Arroyo.
Apan nganong napalambo mang Aquino ang nasudnong ekonomiya? Nga mao nay giilang ikaduhang labing paspas nga nitubo sa tibuok Asya sunod sa China? Lalisunon pa nakaabot na ba sa mga kabos ang ekonomikanhong paglambo apan di mapanghimakak nga natukod ang mas daghan ug mag lig-ong kadalanan ug mga eskuylahan. Nanukad tingali ning tanan sa pagtuman ni Aquino sa saad nga di siya mangawat. Human sa taas uyamot nga diktadura ug daghan uyamot nga kurakot nga mga pamunoan, maayo na kaayo na nga sinugdanan.
- Latest
