Mas lapad nga gubat

Wa pay klarong sulbad sa terorismo. Apan naklaro na unsay di makasulbad ini: Gubat. Mas klarong pagkasulti: Di mapukan ang mga terorista pinaagi lang sa gubat nga di dasonan sa pagtubag sa gamot nga mga hinungdan sa terorismo. Naklaro na nga ang gubat sa Iraq gawas nga wa kabadlong mahimo pa gani nga nakapasamot sa hulga sa mga terorista.

Duha ka gubat ang gilusad sa Estados Unidos pagpanimawos sa bangis nga pangatake sa mga terorista sa New York ug Washington D.C. niadtong 2011. Bisan didto sa Afghanistan si Osama bin Laden pagpangangkon og responsibilidad, giapil ang Iraq tungod sa pasangil nga naghupot ang diktador nga si Saddam Hussein og weapons of mass destruction.

* * *

Bisan nabisto nga sayop ang kasayuran nga gipasikaran ni kanhi US President George Bush sa paglusad sa gubat sa Iraq, uwahi nang tanan. Napukan nang diktadura, nabitay na si Saddam ug nakabuylo nang mga Amerikanhon pagtukod og bag-ong gobyerno ug pagtudlo og demokrasya sa mga Iraqi.

Napatay si bin Laden ug ubang mga lider sa Al Qaeda sa nagkalainlaing kanasuran. Nakaangkon og sukaranan sa kalibotanon nga pagsaulog nga nabungkag nang bangis nga mga terorista. Bahala na kon napamatud-an nga ahat ang mga pangangkon og kadaogan. Tungod sa pagtumaw sa Islamic State of Iraq and Greater Syria (ISIS) nga mas pintas sa Al Qaeda.

* * *

Di hinuon hingpit nga makiangayon ang pasangil nga ang gubat ra ni Bush maoy nakapatumaw sa ISIS. Angay sang tukion ang dinalidali nga pagpapauli ni US President Barack Obama sa mga sundawong Amerikanhon gikan sa Baghdad ug ubang bahin sa Iraq. Nga mahimong nakatabang sa pagpalig-on sa ISIS.

Mao nga samtang si Obama ang nakapatay ni bin Laden ug nakasawo sa pasiunang kadaogan sa gubat batok sa mga terorista siya sab ron ang makasapupo sa sumbalik sa ISIS ug ubang militanteng mga pundok nga di mahitabong mahipos bisan pila pa ka toneladang pulbora ang ipabaha sa tungatungang sidlakan.

* * *

Mapugos sab si Obama pagsubli sa iyang paagi pakiggubat sa ISIS sa Syria ug Iraq. Kutob ba lang sa air strikes o mosugot na nga magpada og ground troops? Kon padayong magdumili paghupot og liderato sa gubat batok sa ISIS, di ba mameligrong mahawongan sa mas agresibong liderato ni Russian President Vladimir Putin?

Sayop sang orihinal nga pagtuo nga ang ambisyon sa ISIS kutob ra sa pagtukod og lunsay nga Islamic State sa Iraq ug pinalapdang Syria. Human gipahagsa ang ayroplano sa Russia duha ka semana ang nilabay, human sa pag-atake sa Lebanon sa niaging semana ug human sa pagpangrakrak sa Paris niadtong Biyernes, angay nang pangandaman ang nag-ung-ong nga mas bangis nga mga pangatake sa inosenteng mga sibilyan sa kasadpang mga nasud.