Pagmatuto sa mga bata
Camomot-Franza Road — Kun may pagduda ka sa kamatinud-anon sa mga paningkamot pag-amuma sa mga bata, mangahas ko pagdapit nimo sa pinuy-anan sa mga anghel sa kinapusoran sa Barangay Labangon sa Dakbayan sa Sugbo. Nia dinhi ang Reception and Study Center for Children (RSCC) sa Department of Social Welfare and Development (DSWD).
Naabtan namo dinhi ang 16 ka bata nga pulos biniyaan. Usa pa ka semana ang kamanghoran ug usa ka tuig ang kamaguwangan. May lima sab ka special children nga usa ka tuig ang kamanghoran ug walo ka tuig ang kamaguwangan. Pulos sila nakaangkon og tukma nga pagmatuto. Pulos nahatagan sa batakang panginahanglan sa paghigugma.
***
Matag usa sa mga bata dinhi may talagsaong sugilanon. Kasagaran gibiyaan sa ilang mga ginikanan apan nakaangkon og bag-ong paglaom. Usa nila napunitan sa downtown area sa Kalubihan, Cebu City. Labing uwahing niabot dinhi ang bata nga gihimugso sa 13 anyos nga anak nga gipaangkan sa iyang kaugalingong amahan.
May mga bata sab dinhi nga gibiyaan sa tambalanan kay way ikabayad ang mga ginikanan. May mga bata sang gidam-ok sa basurahan maong may mga samad na sa pinaakan sa mga hulmigas dihang nakit-an. Duha nila napilian na nga sagupon sa langyaw nga mga ginikanan ug gitakdang dad-on na ngadto sa gawas sa nasud sa mosunod nga mga adlaw.
***
Matod ni Rosalina Tatoy, tagduma sa RSCC, gikan sa Enero hangtod sa Nobiyembre karong tuiga, niabot og 40 ka bata ang ang ilang naatiman dinhi. Sa ato pa, 24 na ka bata ang nabalik sa ilang mga ginikanan, o nasagop na sa foster parents, o pormal na gyong nasagop sa bag-ong mga ginikanan uban ang pagtugot sa korte.
Nitataw hinuon si Tatoy nga mas lisod ang pagpangita og mosagop sa special children. Maong maabtan gyud og pila ka tuig una sila mahaw-as dinhi. Kasagaran nila may cerebral palsy, ang uban may Down Syndrome. Malaumon hinuon siyang makakita ra gihapon sila og mga ginikanan nga bulawanon og kasingkasing.
***
Ang mosawo sa mga bata sa RSCC mao ang Adoption Resource and Referral Section (ARRS) nga giduma ni Sheba Dabon. Kinsa nipasabot nga kuti ang proseso apan gikinahanglan aron pagtino nga ang mga bata masagop sa labing mahigugmaon nga mga ginikanan. Gidasig ni Dabon ang mga ginikanan nga way anak o ganahan nga makaangkon og dugang anak sa pagduaw nila sa DSWD aron nga mapahibawo sila sa mga lagda sa pagsagop sa mga bata.
Maayo ang kahimtang sa mga bata dinhi, daghang salamat sa tabang sa pribadong mga institusyon. Apan di tanang bata maatiman sa DSWD ug sa non-government organizations. Mas malungtaron nga sulbad ang paghimong mas takos sa mga ginikanan aron nga wa nay batang mapasagdan.
- Latest
