Roxas-Robredo na

Final na g'yud nga ang magtandem paglansar pagka presidente ug bise presidente sa nasud atol sa eleksyon karong sunod tuig mao na sila si Mar Roxas ug Leni Robredo.

Gihulagway sa kadaghanan nga lig-on ang mao nga tandem nila ni Roxas ug Robredo.

Ang ilang ikakontra mao ang tandem nila ni Grace Poe ug Chiz Escudero ingon man ni Vice President Binay ug Gringo Honasan. Ambot kon si Rodrigo Duterte molansar ba g'yud kaha og dayon pagka presidente.

Gipasabot ni Robredo nga pagka senador g'yud unta ang gusto niya nga labanan, apan dili usab niya kabalibaran si Mar Roxas nga mihangyo gayud nga sila ang magtandem.

Matud ni Leni Robredo nga si Mar suod kaayo nga higala sa namatay niya nga bana nga si kanhi DILG Secretary Jesse Robredo. Aw, sila si Mar ug Leni wala g'yud hinuo'y rekord nga nangawkaw og kuwarta sa gobiyerno.

Ang Liberal Party hinuon nakasugat og kontrobersiya tungod sa gihimo sa ilang kauban nga atol sa kalihukan nagpasundayag og mga law-ay nga talan-awon pinaagi sa mga babaye nga ilang gikuha isip maglilingaw.

Apan dili man 'sab maayo nga iduhig na lang ang ubang mga tawo nga wala g'yud tawo'y labot. Apan para nako, kadtong nagpasiugda sa mao nga kalihukan angay nga ibasura atol sa eleksyon.

* * *

Sa bag-ong Pulse Asia survey, ang hapit tanang mga ngalan sa mga politiko nga gusto nga mag-senador sa eleksyon sunod tuig, pulos mga karaang nawong sa Senado.

Gani ang uban niini mga karaang kongresista ug adunay mga igsuon, anak o paryente sa mga politiko. Hain naman diay kadtong mga ligdong nga kandidato sa eleksyon kaniadtong 2010 ug 2013?

Hain naman sila si JC delos Reyes ug Nicanor Perlas?

Adunay mga tawo nga klaro nga nakatabang aron matul-id ang hiwi nga sistema sa panggobiyerno, ilabi na sa isyu sa paggasto sa buhis sa mga Filipino.

Hain naman si Atty. Levi Baligod, kadtong isog kaayo nga whistleblower nga bisan sa kakuyaw sa iyang gibuhat nga nakapapriso sa mga banggiitang mga senador nga sila si Juan Ponce Enrile, Bong Revilla ug Jinggoy Estrada?

Kadto si Baligod lang ang nakapasaka og kaso sa mga kongresisista nga nalambigit sa pork barrel scam ni Janet Lim Napoles. Si Baligod lang ang may kaisog ug nakaako pagtulisok sa mga state auditors sa Commission on Audit nga mga kunsabo sa mga magbabalaod.

Kini nga klase sa mga tawo maoy angay nga ibutang nato sa senado. Sa daku niya nga nahimo, haum kaayo kadto si Baligod nga tawgon og "people's advocate."

Apan ambot ngano nga wala man kini moapil sa nagtinguha pagka senador nga angayan man g'yud unta siya sa puwesto aron mahimo nga guwardiya sa atong buhis sa matag higayon sa pagpasar sa tinuig nga General Appropriations Act.

Kun dili gud bantayan pag-ayo ang pagpanday sa atong nasudnong budget, hayan daghang mga bilyako kaayo nga mohimo'g paagi aron ang pundo sa kagamhanan mahipunta sa kaugalingon nilang bulsa.

* * *

Dinhi sa dakbayan sa Sugbo, ang Team Rama nakapahibalo na sa kompleto nila nga line-up, gikan sa mayor ngadto sa konsehal, nga magpapili atol sa eleksyon sunod tuig.

Tan-aw nako, adunay mga dumadaog ug aduna 'say mga pildehonon. Sa Bando Osmeña Pundok-Kauswagan, si kanhi mayor Tomas R. Osmeña wala magdali sa pagbutyag sa iyang line-up.

Apan kaming mga sakop sa media nga nadestino sa City Hall nahibawo na hinuon sa uban nga kandidato sa BOPK apan dili pa kompleto. Duna 'say mga dumadaog, duna 'say pildehonon. Sa ato pa, bawot-bawot ra.

Sa pagka mayor hinuon, pulos lig-on sila si Mayor Michael Rama ug si Osmeña nga magsangka. Si Vice Mayor Edgardo Labella makabentaha ni Konsehal Nestor Archival kay ilado na si Labella sa south district.