Natanggong sa SRP
Gitak-opan sa Cebu City Transportation Office ang tibuok agianan sa South Coastal Road habig sa dagat sugod sa alas-5:30 sa hapon niadtong Sabado. Duha ug tunga ka oras sa di pa ang gitakdang pagsugod sa Color Manila Blacklight Edition-Cebu.
Way bisan unsang pahibawo nga gibutang ang CCTO ug ang mga tigpasiugda sa pagtak-op sa dan. Nga nisangpot sa grabeng kahuot sa mga sakyanan nga nagsawo na lang intawon sa nahibiling bahin sa dan. Nakapasamot sa kasakit sa dughan sa natanggong nga mga motorista ug mga pasahero nga sa gitak-opan nga bahin sa dan way bisan usang nagtikaw-tikaw. Hangtod sa paglabay namo sa alas-8:15 sa gabii wa pa kasugod ang lumba.
***
Dihang nanawag ko sa CCTO pagpakisayod nganong wa sila moluwat og mga pahibawo pagpasidaan sa publiko nga tak-opan ang tibuok seaside lane sa South Coastal Road, ang babaye nga nakatubag nako niingon nga ang opisyal nga traffic advisory ilang gi-post sa Facebook page sa "CITOM Official."
Pag-abli nako sa page, nabasa nako ang lista sa "ACTIVITIES ON SEPTEMBER 5, 2015 (Saturday). Mao ni ang ikatulo sa listahan: "BLACK LIGHT MANILA-CEBU LEG RUN" at 5:30 PM ROUTE = From SRP Senior Citizen Bldg., LT going to VIADUCT seaside, U-turn at Maritima follow again SRP seaside U-turn at Parilya follow again SRP seaside RT going back to Senior Citizen Bldg.
***
Wa sila maghisgot og tak-op sa dan. Igo lang gipahibawo ang ruta sa dagan. Bisan nakabasa pa ang tanang motorista di gyod sila maalerto nga kinahanglan diayng likayan ang South Road Properties sugod sa alas-5:30 sa hapon.
Pila sa mga motorista ug pasahero ang may access sa Facebook? Pila sa mga may FB ang nakatultol sa ilang page? 4,300 ray likes sa "CITOM Official." Di hinuon sila ray napakyas paggamit sa bag-o nilang ngan. Bisan si Mayor Mike Rama motawag gihapon sa CCTO nga CITOM ug maglisod pag litok sa apelyido sa bag-ong executive director nga si Atty. Rey Gealon.
***
Nipasalig si CCTO Operations Chief Joy Tumulak sa pagtawag sa atensiyon sa mga tigpasiugda sa Color Manila Blacklight Edition-Cebu sa ilang kapakyas pagpasidaan sa mga motorista ug mga pasahero. Usa sa mga panginahanglan sa CCTO nga posibleng nalapas mao ang pagbutang og traffic advisory sa duha ka tumoy sa ruta pila ka adlaw sa di pa ang lumba.
Wa kasusi si Tumulak sa pagkabara sa trapiko sa SRP niadtong Sabado sa gabii apan gipahibawo sa iyang supervisors nga naablihan pagbalik ang dan pagka alas-9 sa gabii. Nireklamo hinuong mga motorista nga serado pang seaside lane pasado alas-10 sa gabii. Ug nga bisan ang taga CCTO wa kapasabot nila sa kalihokan.
- Latest
