Terminal ug merkado
Gipasabot ni Cebu City Mayor Mike Rama ang mga sukaranan sa iyang pagpakandado sa One Citilink Terminal sa Natalio Bacalso Avenue:
• Ang aso ug saba sa terminal makadaot sa mga pasyente sa Cebu City Medical Center (CCMC) ug sa mga tinun-an sa eskuylahan;
• Gigamit ang terminal sa kampanya sa iyang politikanhong mga kaatbang sa piniliay niadtong Mayo 2013;
• Way business permit ug utangan og P12.8 milyones ang mga tagduma sa terminal sa City Hall; ug
• Kuwestiyonable nang daan ang pagkatukod sa terminal niadtong 2003 kanus-a iyang gilalis pag-ayo si kanhi Mayor Tommy Osmeña ug anhing Konsehal Jingjing Osmeña niadtong bise mayor pa siya.
* * *
Apan gilalis ni Atty. Ralph Sevilla, abogado sa One Citilink Terminal Inc., ang mga sukaranan nga gitumbok sa kamandoan ni Rama pagpasera sa terminal:
• Wa na ang CCMC duol sa One Citilink Terminal, nabalhin na sa buhatan sa Bureau of Fire Protection nga mas duol sa Cebu South Bus Terminal. busa ang nauwahi unta maoy unang gipakandadohan ni Rama;
• Natuman sa One Citilink ang tanang panginahanglan sa business permit apan ang City Hall maoy wa mohatag nila; ug
• Hagbay ra silang nangayo og mga dokumento nga sukaranan sa gipaningil ni Rama nga P12.8 bilyones nga utang apan way papel nga nahatag ang City Treasurer's Office hangtod karon.
* * *
Sa iyang bahin, giangkon ni kanhi Mayor Osmeña nga si Art Osmeña, di niya paryente kay managsama lang sila og apelyido tungod sa naturalization, maoy nitanyag sa pagtukod sa terminal. Matod ni Osmeña ang bugtong sukaranan ni Rama pagsupak sa terminal mao ang ilang panaghigala ni Art. nga igsuon sa laing inilang negosyante sa Sugbo nga si Manny Osmeña, ang tag-iya sa Movenpick sa Lapu-Lapu City.
Apan gipasabot ni kanhi Mayor Osmeña nga di mahimong balibaran ang mga negosyante nga magtukod og mga kompaniya sa Dakbayan sa Sugbo tungod lang kay mga higala niya sila. Nipuno siya nga ang dakong kapuslanan sa terminal napamatud-an sa dakong kayagaw nga namugna sa pagpasera ni Rama sa One Citilink.
* * *
Matod ni Osmeña di makiangayon ang pagpanggukod ni Rama tungod lang sa pamolitika. Niingon siya nga di angayng dumtan ni Rama ang mga negosyante nga igo lang nipadayag sa ilang pagsuporta sa Bando Osmeña-Pundok Kauswagan (BO-PK).
Nipasangil si Osmeña nga samang pagpanggukod ang nahiagoman sa mga mag-uuma nga namaligya sa ilang abot sa bakanteng luna duol sa South Road Properties. Gihagit ni Osmeña si Rama pagpasabot nganong iyang gitugotan bisan way business permit ang merkado sa Banawa, Guadalupe nga giduma sa mga dumadapig sa Team Rama. Sa iyang bahin, nipadayag og kakugang si Rama sa pasangil. Nisaad siya pagsusi tinuod bang ilegal ang operasyon sa merkado.
- Latest
