Nganong di kabiya
Duha ang hinungdan nga gitumbok sa mga suod ni Presidente Noynoy Aquino nganong di siyang katahan sa ilang relasyon ni Direktor Heneral Alan Purisima, ang ni-resign nga hepe sa Philippine National Police (PNP), bisan sa nagbuntaog nga mga ebidensiya nga gisukwahi ang iyang mga sugo ug gihatagan siya og sayop nga kasayuran sa Oplan Exodus:
" Dugay ug lawom ang ilang panaghigalaay ug nakapahimus si Purisima sa panultihon sa mga labing sikit ni Aquino nga "walang iwanan" (way biyaay); ug
" Human sa bangis nga pagpatay sa iyang amahan ug sa sunudsunod nga mga kudeta batok sa pamunoan sa iyang inahan, gihatagan ni Aquino og dakong importansiya ang seguridad ug si Purisima ang usa sa giila nga labing matinud-anon niya.
* * *
Sa iyang paghapit sa Arangkada sa DYAB Abante Pa, Bisaya!, si Joel Rocamora, Kalihim sa National Anti-Poverty Commission, niangkon nga ang hingpit nga pagsalig ni Aquino kang Purisima nakamugna og daghan na uyamot nga kontrobersiya, apan nanalipod gihapon sa pagtugyan ni Aquino kang Purisima sa pagduma sa operasyon sa Mamasapano:
" Si Purisima ang nagtikad sa intelligence information nilang Zulkifli bin HIr alyas Marwan ug Basit Usman sukad sa sinugdanan busa di ikapasa ni bisan kinsa;
" Suspendido si Purisima isip hepe sa PNP di sa pagka polis; ug
" Ang suspenso di silot kon dili gitumong lang aron di makahilabot si Purisima sa imbestigasyon sa Ombudsman sa iyang mga kaso, ug ang operasyon di makahudlat sa mga saksi ni makaguba sa mga ebidensiya batok ni Purisima.
* * *
Naneguro si Rocamora nga bisan sa kasaba sa mga kaatbang ni Presidente Aquino di molampos ang bisan unsang mga pagsuway pagpalagpot niya sa katungdanan. Matod way kaligdong sa pagpangu og bisan unsang protesta silang Norberto Gonzales ug Peping ug Tingting Cojuangco.
Nabalaka hinuon si Rocamora sa maniobra sa pipila ka politiko pagbuwang sa mga Muslim ug mga Kristiyano. Gipasanginlan niya sila sa pagpaburot sa pagduda nga ang Moro Islamic Liberation Front maoy nitiwas pagpatay ug nanamastamas sa mga patayng lawas sa mga sakop sa Special Action Force.
* * *
Gipasabot ni Rocamora nga bisan sa trahedya sa Mamasapano angayng ipadayon ang peace process uban sa MILF:
" Samtang limitado ra sa Sulu ang influencia sa Moro National Liberation Front, mas lapad ang teritoryo sa MILF sa Maguindanao ug ubang bahin sa Muslim Mindanao;
" Gawas nga suod sa MILF ang tinahud nga mga Ulama, o mga magtutudlo sa Islam, alyado sab nila ang labing dagkong pundok sa mga negosyanteng Muslim; ug
" Samtang si Tsirman Nur Misuari sa MNLF nidemanda nga ipahimutang sa tag-as nga katungdanan sa gobyerno ang iyang mga kumander, ang MILF nidemanda nga palambuon ang kahimtang sa kinabuhi sa mga molupyo sa Muslim Mindanao.
- Latest
