Multicab nga pasaheroan

Kanunay g'yud ko nga makakita sa makalulooy kaayo nga kahimtang sa mga pasahero nga mosakay sa mga multicab nga gitugotan sa Land Transportation Franchising and Regulatory Board  aron gamiton isip pasaheroan.

Unsaon, kini gud nga mga opisyal sa LTFRB wala man kini makasakay niini'ng mga multicab nga gigamit isip pasaheroan mao nga dili sila masayod nga kini'ng matanga sa mga sakyanan dili g'yud unta angay'ng gamiton isip pasaheroan.

Tungod sa kagamay niini nga sakyanan, nagdikit na lang gani ang mga tuhod sa mag-atbang nga pasahero. Kun dili ka magbantay sa imong pagsakay, mapangka ang imong ulo ngadto sa atop nga bahin nga ang uban wala gani kisame.

Daghan sa mga pasahero mag-ilogay g'yud sa paglingkod dapit sa pultahan kay aron dali ra nga makakanaog. Mao nga kadto'ng bag-ong pasahero, mokuliot g'yud aron makalingkod sa atubangan.

Lisud tawon kaayo ang pag-agi sa mga pasahero nga nagyuko sa ilang paglakaw kay nag-abot na lagi ang mga tuhod sa mga nag-atbang sa paglingkod.

Ngano'ng gitugotan man ninyo ni taga LTFRB nga ang multicab maapil nga himuon nga pasaheroan? Angay kini nga wagtangon.

Ang nakadaot lang kay walay mga politiko nga ganahan motan-aw niini nga punto kay mahadlok nga kadto'ng mga tag-iya sa mga multicab nga pasaheroan masuko kanila ug dili na mobotar atol sa ilang pagpapili pag-usab.

***

Wala pa gihapon gilihok sa mga sakop sa PROBE sa Cebu City Hall ang mga illegal nga kalihukan nga ato'ng gihisgutan sa miagi nako nga lindog.

Gitug-anan ko ni City Administrator Lucelle Mercado nga motug-an diay kaniya ang hepe sa PROBE nga si Raquel Arce sa panahon nga ako siya'ng sawayon sa kapakyas niya pag-aksyon sa angayan nga lihukon.

Ang imong gihimo Ma'am Raquel mao pa ang pag-aksyon dayon mas nindot pa, dili kay sumbong-sumbong. Magtimaan man gud ko sa mga pasalig nga dili tumanon.

Ganahan kaayo ko makighigala sa mga kawani sa kagamhanan nga matinud-anon sa ilang mga tahas apan dili ko gusto sa mga kawani sa gobiyerno nga wala makatuman sa ilang katungdanan.

In fairness sa higala ko nga si Raquel, daghan na siya og trabaho kay siya man usab ang market administrator. Kun dili na unta niya madala ang pagka hepe sa PROBE ihatag na lang kana og laing tawo nga makadumala.

Usahay hilasan ko molitok sa kahulogan sa PROBE. Apil diha "Restoration ug Prevention." Asa man diha ang restoration nga gipasagdan ra man ninyo ang nakahatag og kasamok diha sa mga aseras ug karsada?

Asa man 'sab diha ang "prevention" nga wala man kamo makabadlong sa mga nagtukod og balay nga gilahos ngadto sa sidewalk? Dili na kinahanglan nga ibatbat nako kun asa kini dapit ang akong gipasabot.

Ang angay nga buhaton sa mga sakop sa SPEED mao nga bukaha ang inyong mga mata sa pagsuroy-suroy ninyo sa lainlaing dapit sa dakbayan ug gamita ang inyo'ng mga utok aron makasabot kamo hain ang angay ninyo nga aksyonan.

Ang lihok maoy atong pasultihon dili kay ang mga pulong maoy atong pabuhaton. Nasabtan ba ninyo?

***

Dili maayo ang gihimo ni Mandaue City Mayor Jonas Cortes nga gitugotan niya nga gamiton ang usa ka "lane" sa karsada gikan sa National Highway paingon sa Barangay Bakilid aron lang butangan sa dagko kaayo nga mga concrete box culverts.

Mao pa'y nagproblema sa grabe nga trapiko ang Mandaue City gidugangan pa sa mao nga problema. Kamo'ng ubang mga opisyal sa Mandaue, may mahimo pa nga dili mosamot ang kahuot sa mga sakyanan.

Sama gud diri sa dakbayan sa Sugbo nga panahon sa adlaw lang ang pagtrabaho sa karsada. Unya ang mga heavy equipment dili ipabilin diha sa karsada aron nga dili kini makahasol sa ubang mangagi nga sakyanan.

Palihug kuno Mayor Cortes, himoi kuno og personal nga pakisusi. Wala na lang ko misuway og tawag niini'ng mayor sa Mandaue kay matud sa mga reporters dili kini ganahan nga magpa-interview.

Unsaon man gud, dili man 'sab moinsister ang mga reporters.