Merida ni Omek

Tayud, Consolacion, Cebu – Nagduda si Proserfina "Nang Susing" Cempron, inahan sa napukan nga Bol-anon nga Special Action Force (SAF) nga si PO1 Romeo "Omek" Cempron, nga nakapanglantaw nang iyang anak nga may daotang mahitabo niya sa sekreto nilang operasyon pagsikop sa gipasanginlang mga terorista nga silang Abu Marwan ug Basit Usman sa Mamasapano, Maguindanao.

Usa ka buwan sa wa pang operasyon, nakauli si Omek sa ilang lungsod sa Danao, Bohol. Diin ang gipatukod niyang bay alang ni Nang Susing gipalibotan niya og mga bandila sa Pilipinas ("Mora ming Malakanyang," segun sa inahan) ug gilikosan sa bakos sa basiyo sa mga bala sa machine gun nga maoy iyang armas sa SAF.

***

Gipangutana ni Nang Susing si Omek nganong iya tong gihimo. Igo lang niingon si Omek nga dugay na to niyang gustong buhaton. Gipamutang sab ni Omek sa bungbong sa bay ang higanteng mga hulagway sa ilang mga operasyon sa SAF sa Zamboanga ug ubang bahin sa nasud.

Samtang didto sa Danao, gitawgan si Omek sa iyang kadagkoan kay magsugod nang ilang operasyon sa Maguindanao. Apan way barko nga gipalarga gikan sa Bohol tungod sa bagyong Seniang. Natanggong si Omek sud sa pila ka adlaw. Apan wa gyud magsaba ni Nang Susing ni sa iyang asawang si Dr. Christine Abucay-Cempron sa kakuyaw diay sa nag-ung-ong nilang operasyon.

***

Unang nakahibawo si Christine sa pagkamatay ni Omek dayong tungang gabii na niadtong Enero 25 pinaagi sa text sa nakakuha sa iyang mobile phone. Naproblema ang mga igsuon ni Omek, nga pulos lalaki, unsaon pagsulti ni Nang Susing.

Gipaanhi sa Sugbo ang ilang inahan ug gikuyogan pagduaw sa ikaduha nilang igsuon nga nasud sa Cebu Provincial Detention and Rehabilitation Center (CPDRC) tungod sa kasong pagpatay. Dayon gipa-order siya og bisan unsang ganahan nga pagkaon ug gipapili og bisan unsang ganahan nga sinina. Apan dihang gitug-anan sa kamatayon ni Omek, nitiyabaw gihapon si Nang Susing nganong gikuha ang iyang kamanghorang anak.

***

Gibalhin nang haya ni Omek sa St. Joseph Parish dinhi pangandam sa paglubong sa iyang patayng lawas sa minteryo luyo ra sa simbahan karong Dominggo. Dinhi siya nag-elementarya ug high school kay dinhi nadestino ang iyang amahan isip security guard sud sa 13 ka tuig hangtod nga namatay tungod sa kanser.

Bisan managsilingan ug magka-edad, wa magkaabot silang Omek ug Christine sa eskuylahan. Ila nang mga higala maoy naningkamot pagtupo nila. Gisungog si Christine sa iyang kaubanang kanhi aktibista sa University of the Philippines (UP) Cebu High School nganong nagminyo og polis, SAF pa gyud. Nikumpisal si Christine nga sa sinugdanan wa siyang kahibawo unsa ka-espesyal ang SAF. Human sa trahedya, nanumpa siyang maningkamot nga di makalimtan ang kamabayanihon sa SAF44.