Sige lang pabilib

Puwerte'ng grabeha na sa problema sa trapiko dinhi sa dakbayan sa Sugbo karong mga adlawa. Unsaon, dunay mga traffic enforcers sa CITOM ug apil ang traffic enforcer sa mga barangay, dili aktibo nga modireher sa mga motorista.

Ang Gorordo Avenue apil sa mga karsada nga grabe kahuot sa mga sakyanan apan adunay mga traffic enforcers nga gidistino mora'g dili makamao mopatuman sa balaod sa trapiko.

Kagahapon sa buntag, naghuot ang mga sakyanan nga miagi sa Gorordo Avenue atubangan sa Lahug Elementary School. Dunay tulo ka traffic enforcers sa barangay nga diha nagbarug atubangan sa tunghaan.

Apan mora lang og mga "pahoy," kanang mga tawo-tawo sa humayan, nga wala makabadlong sa daghang motorsiklo nga abusado kaayo nga nagparking sa karsada. Maayo pa og wala na lang sila diha kay wala man gihapon sila'y nahimo.

Atubangan sa Camp Sotero Cabahug, adunay babaye nga traffic enforcer nga nagbarug, apan wala makabadlong sa drayber sa kotse nga gikan sa pikas daplin mitabok sa karsada bisan huot kaayo sa mga sakyanan ang Gorordo Avenue.

Wala tingali makasabot o masayod ang mao nga traffic enforcer sa kahulogan sa "solid line" nga gipahimutang taliwala sa karsada. Dili tukma ang gihimo sa mao nga drayber ug angay unta kadto nga dakpon sa traffic enforcer, apan wala niya himoa.

Utro pa nga mora'g "pahoy" ang mao nga traffic enforcer. Ako nga nakakita ug nasuheto sa tukma'ng balaod sa pagmaneho og sakyanan igo lang nakapanglingo-lingo sa gihimo sa mao nga drayber nga mitabok sa karsada ug sa nagtanga lang nga traffic enforcer diha sa duol.

Kun ingon niini nga matang ang traffic enforcer sa CITOM, pastilan, makuli nga matuman ni Mayor Michael Rama ang iyang pangandoy nga mapahapsay ang dagan sa trapiko dinhi sa dakbayan.

Alang kanako, kompleto sa balaod ang dakbayan. Kun wala man hatagi og Temporary Operators Permit  ang mga sakop sa CITOM, duna sila'y mga Traffic Citation Tickets nga magamit sa pag-isyu ngadto sa mga masalaypon sa balaod.

Human maisyuhi og TCT, pasakaan og kaso ang mga hingtungdan kun ila ra nga ibaliwala ang giisyu kanila nga resibo. Panahon na nga ipakita sa CITOM nga aduna sila'y ngipon nga ialkontra sa mga drayber nga dili motuman sa balaod.

***

Sigurado ko nga daghang mga biktima sa bagyo'ng Seniang sa habagatang mga lungsod sa Sugbo ang nahiubos kang Vice President Jejomar Binay kay wala kini mahatagi og hinabang sa pagbisita niini sa miagi'ng Domingo.

Dunay pipila ka pamilya kang kansang panimalay giguba sa bagyo'ng Seniang ang gipanghatagan og P10 mil ug kadto'ng igo lang nakaangkon ug gagmay'ng kadaot, nakadawat usab og P5 mil.

Sa ako na nga giingon, klaro man gud kaayo nga pamolitika ni Binay ang pag-adto g'yud sa mga lungsod unya mitunol og mga hinabang sama sa pipila ka linata nga sardinas, noodles sa mga tawo nga girekomendar sa mga opisyal sa lungsod.

Kay wala man niya mahatagi ang tanan, sigurado nga mahiubos sila sa bise presidente ug imbes malipay, dili na hinuon kini mopaluyo kaniya. Sayop nga lakang sa pagpamolitika.

Unya pun-an pa sa pagpahigayon dayon og boodle fight kon pagkaon nga magkinamot uban sa iyang mga alyado. Klaro kaayo nga pamolitika. Unya, ang mayor sa Ronda nagyawyaw nga wala sila makadawat og hinabang gikan sa Department of Social Welfare and Development.

Ang tukma unta nga gihimo ni Binay kun gusto siya nga motabang mao nga gipapaspasan niya sa DSWD ang paghatag og hinabang sa mga biktima sa bagyo. Dili kay siya gayud ang personal nga motunol.

Kagahapon, miduaw 'sab si Binay sa Don Vicente Sotto Memorial Medical Center. Dunay nakit-an niya nga bag-o pa lang namatay. Gitunolan dayon og hinabang ang pamilya niini.

Kanindot kun kini pa ang iyang himuon kanunay. Hagiton nako si VP Binay kun tinuod ka nga motabang, pagahini og salapi ang pagtukod sa Cebu City Medical Center. Kaalyado man g'yud mo si Mayor Rama, bi ngano nga wala man nimo kini buhata?

Kun himuon nimo kini VP Binay, tingali mahumot-humot ka'g gamay diri sa Cebu, apan kun pulos lang pasiatab, wala ka g'yuy ayo.