Bugti sa pagmatuto
Sa di pa mahuman ning buwan sa Nobiyembre, tanang nagpangedaron og 60 pataas sakop na sa Philippine Health Insurance Corp. (PhilHealth). Di sila kinahanglan nga magpa-enrol sa mga buhatan sa PhilHealth aron makapahimus sa mga benepisyo sa pagpatambal ug pagpa-ospital.
Bugtong nilang himuon, kon simbako moabot nang panahon sa panginahanglan, mao ang pagpakita sa balidong IDs nga magmatuod sa ilang edad. Di na kinahanglan nga magpakita og dugang mga dokumento pagmatuod sa ilang kahimtang sa kinabuhi. Tanang senior citizens mohangop sa Pasko karong tuiga nga pulos lehitimong mga sakop sa PhilHealth.
* * *
Sa labing uwahing ihap, 6.1 milyones ang senior citizens sa Pilipinas. Sa pagka karon, 3.94 milyones ka senior citizens nakapahimus na sa mga benepisyo sa PhilHealth isip indigent, sponsored, lifetime member, o dependent. Ubos sa bag-ong balaod nga gipirmahan ni Presidente Noynoy Aquino niadtong Nobyembre 5 ug gipatik sa mga mantalaan niadtong Nobyembre 10, dugang 2.16 milyones ka senior citizens makaapil na sa PhilHealth.
Matod ni Senador Ralph Recto, ang nangamahan sa balaudnon sa Senado, di makapangangkon ang gobyerno og universal health care kon laktawan ang senior citizens. Kinsa iyang gihulagway nga makadangop na sa PhilHealth sugod sa paghuyop sa kandila sa ika-60 nga sumad sa ilang adlawng natawhan hangtod sa kataposan nilang ginhawa.
* * *
Sa kapin sa 100 ka milyon ka Pilipinhon, dul-an 80 milyones nay sakop sa PhilHealth--32 milyones ang rehistradong mga sakop ug 46 milyones ang dependents. Ang pagpasakop sa tanang senior citizens usa sa mga lakang sa paningkamot pagpaubos sa PhilHealth coverage sa tanang nagkinahanglan sa benepisyo.
Di ba mabangkarota ang PhilHealth sa pagdaghan sa mga sakop nga makapahimus sa benepisyo? Hinaot nga dili. Gipundohan na sa gobyerno og dugang 5.2 bilyones matag tuig ang National Health Insurance Fund sa PhilHealth nga maoy kuhaan sa dugang gastohan. Pagtapos sa 2013, ang PhilHealth nakatigom og P62 bilyones nga tampo sa mga sakop ug P13 bilyones nga subsidy sa nasudnong gobyerno. Ang PhilHealth nakagasto og P56 bilyones sa mga benepisyo.
* * *
Sa mga hangtod karon nagdumili pagsabot sa mga benepisyo sa senior citizens, angayng panaminan ang sulti ni Senador TG Guingona, tsirman sa Senate Committee on Health: Ang kahimtang sa atong katiguwangan maoy maghulagway sa ilang kabataan; busa ang pag-atiman sa senior citizens maoy samin sa nasudnong kaligdong.
Sila ang nagtukod sa atong mga pinuy-anan, kadalanan ug mga taytayan. Silay nagsugod sa atong panginabuhi ug patigayon. Silay nag-umol sa atong kasaysayan. Palihug hinumdoman lang nato kadtong mga adlaw nga mga masuso pa ta, nga hingpit pang nagsalig sa iyang gugma ug pagmatuto. Wa sila maningil og bayad. Ni pasidungog. Ning panahon sa ilang panginahanglan, makiangayon lang ang pagbugti.
- Latest
