Gasa sa kamapasalamaton
Tangkod nga usa ka tuig human sa makalilisang nga linog sa Bohol, nagpadayon pa ang lokal ug langyawng kahugpongan sa pagtabang sa mga Bol-anon. Bisan ang nagkalainlaing kahugpongan nga among gikauban pagpasiugda og rehabilitation projects alang sa mga dapit sa amihanang Sugbo nga naggusbat sa bagyong Yolanda nangutana unsa pay ilang ikatabang sa Bohol.
Si Presidente Aquino kaduha na magbalik sa Bohol. Natug gyod gani sa tolda sa Loon. Ambot mao bay hinungdan nga mas paspas ang mga proyekto pagpabarug sa Bohol kay sa mga proyekto sa Negros Oriental nga mas unang naigo sa linog. May sukaranan bang pagtuo nga mas gaan nga tabangan ug busa mas pinangga ang Bohol?
***
Di ikatandi ang kadaot sa Bohol sa mas lapad nga danyos sa amihanang Sugbo ug silangang Kabisay-an nga gikusukuso ni Yolanda. Di sab himsog ang pagtandi sa gidaghanon sa tabang nga ilang nadawat gikan sa gobyerno ug pribadong sektor.
Apan makahatag tingali og gamayng katin-awan ang among kasinatian dihang nagpadayon pang Kapamilya Relief Campaign sa Bohol. Bisan asa mi--sa mga pantalan, terminals, tugpahanan, o shopping malls may mosugat namo pagpasalamat sa tanang hinabang alang sa Bohol. Giusab sa mga Bol-anon ang ilang mga mensahe pakitabang nga gisuwat sa kadalanan ug kabukiran ngadto sa pasalamat. May mga tinun-an nga ni-upload og videos sa pasalamat sa YouTube.
***
Mas gaan tingaling tabangan ang mga mapasalamaton. Sa amihanang Sugbo, may mga mayor nga wa magtagad dihang gitanyagan og mga hinabang. Kay tingali wa mohaom sa ilang panginahanglan. O nalinga lang sa mas dinaliang mga gimbuhaton pag-atiman sa mga biktima. Sila say sabaang nangreklamo nga kuwang ang mga hinabang nga ilang nadawat.
Apan may mga mayor sab nga nihangop ug nagpasalamat sa tabang gitanyag nga hinabang ug nituman sa tanang panginahanglan pagpahapsay sa pag-apud-apod sa mga hinabang. Nikumpisal ang mapasalamatong mga mayor nga mas abunda ang mga hinabang nga ilang nadawat gikan sa pribadong kahugpongan ug ubang kanasuran.
***
Tungod sa hangyo ni Gobernador Edgar Chatto sa Bohol nga pagkaon nay among dad-on, nagkarga mi sa SkyPatrol og puso, pan ug linung-ag nga itlog sa pag-adto sa Loon usa ka adlaw human sa linog. Nauwaw ming kuwang ang among da sa nagpunsisok nga mga biktima. Apan hapsay silang naglinya, nagpasalamat ug nangomedya pa nga mas lami gyong pan, puso ug itlog sa Sugbo.
Pila ka adlaw human sa bagyo, nagda og duha ka trak sa mga hinabang ang usa ka relihiyusong kahugpongan sa amihanang Sugbo. Gipara sila og duha ka babaye pag-abot og awaawng barangay. Igo rang nahatagan og hinabang ang mga babaye, gilibotan sila sa kalalakin-an nga nitilok sa ilang kargamento. Wa nila isaba ang insidente. Apan nahadlok nang mamalik paghatod og dugang hinabang.
- Latest
