Mi-dive si VP Binay

Dili g'yud makabasol si Vice President Jejomar Binay ngadto sa katawhan nga nawad-an na og pagsalig kaniya tungod sa daghan kaayo nga "adverse reports" nga wala kaayo niya matubag.

Dili nimo kalikayan nga mahadlok g'yud ang katawhan nga mosuporta ni Binay sa iyang tinguha nga mag-presidente sa nasud unya sa eleksyon sa 2016 kay daghan ang dili maayo'ng report batok kaniya.

Ang mga tawo gusto g'yud nga walay mansa ang pagkatawo sa mahimo'ng presidente sa atong nasud. Busa kon dili makapasabot si Binay nga bakak ang report batok kaniya, dili siya makakuha sa suporta sa katawhan.

Kon maminaw ka lagi sa mga balita sa TV ug radio, labaw na og mobasa ka sa mga balita sa mantalaan, makapanglingo-lingo ka g'yud nga maghuna-huna sa giingong dili maayo'ng binuhatan ni Binay.

Kay kanunay man nako nga madungog kada adlaw g'yud ang mga report kabahin ni Binay, hayan dili na ko mobotar pa kaniya kon iyang idayon ang plano nga pagpapili pagka presidente sa 2016 elections.

Aw gisusi pa hinuon karon ang katinuoran sa pasangil nga si Binay adunay labing menus upat ka mansyon ug kapin sa 300 ka hektareya nga hacienda nga kuno gipadumala lang sa iyang mga "dummy."

Kon dili man kini tinuod, angay'ng pamatud-an ni Binay nga namakak ang mipasangil kaniya nga si kanhi Makati Vice Mayor Ernesto Mercado.

Si Mercado apil sa mibutyag nga si Binay nakadawat og minilyon ka pesos nga kuwarta isip komisyon sa gi-overprice nga P2.7 bilyones nga Makati Parking Building ug uban pa nga proyekto sa Makati.

Ang kanhi bise mayor sa Makati misaysay gayud atubangan sa Senate Blue Ribbon Sub-Committee nga si Binay mao ang tinuod nga tag-iya sa Agrifina Corp., ang kompaniya nga giingong maoy tag-iya sa lapad kaayo nga hacienda sa Barangay Maligaya, Rosario, Batangas.

Ang akong kauban sa opisina mitan-aw sa iyang Facebook ug nakita ang hulagway sa mga piggery ni Binay sulod sa hacienda nga matud pa "air-con" ang mga baboy. Bi, kinsa may dili makapanglingo-lingo ana.

Lapad kaayo ang Rizal Park sa Manila apan ang gidak-on kaunomon pa kini ka pilo usa makatumbas sa kalapad sa hacienda nga giingong iya ni Binay.

Angayan gayud nato nga himbisan pag-ayo si Binay kay nagtinguha man gud siya nga mahimo'ng presidente sa atong nasud. Sayonan ka nga kun masayop kita pagpili, unom ka tuig kita nga magmahay.

Kon gusto si Binay nga mosaka pagbalik ang mi-dive niya nga popularity rating, angay nga ipresentar niya ang mga ebidensya nga dili tinuod ang tanang gipasangil kaniya.

Usbon nako, kita'ng katawhan angay nga mag-inabtik ug magpakabana gayud sa pagpili sa atong mga opisyal, ilabi na'g presidente sa nasud na ang hisgotan.

Husto ang gihimo sa mga sakop sa media nga mihisgot gayud sa isyu batok ni Binay kay aron magiyahan ang katawhan kon kinsa ang ilang pilion atol sa eleksyon.

Labing maayo usab nga nabulgar kini nga isyu mentras sayo pa kay maghatag kini og higayon ni Binay sa pagtubag. Dili man gud basta-basta ang pasangil batok ni Binay.

Tiaw mo, overpricing sa gipatukod nga Makati Parking Building, unya ang giingon nga "luto'ng macao" nga mga bidding sa mga proyekto sa Makati atol nga siya pa ang mayor.

Mahuna-huna man gud sa mga tawo nga kon tinuod ang pasangil ni kanhi Vice Mayor Mercado, makaingon kita nga mao diay nga nakatigum og daghang katigayonan si Binay.

Kon tinuod man nga si Binay ang tag-iya sa korporasyon nga tag-iya sa kapin sa 300 hektareyas nga hacienda didto sa Batangas, ang pangutana nganong wala man kini iapil sa iyang Statements of Assets and Liabilities?

Nakadungog ko sa balita nga si Binay miangkon nga ang iyang katigayonan miabot lang og P60 milyones apan duna siya'y balay nga may elevator, sa ato pa subra sa upat ka andana.

Unya anaa man kana mahimutang sa Makati nga mahal kaayo ang yuta, mahal g'yud kaayo na. Unya daghan pa og katigayonan si Binay, katuohan kaha nga P60 milyones ra'y iyang kuwarta?