Di mapabarug pagbalik ang kampanaryo sa Basilica del Sto. Niño hangtod sa Piyesta Senyor sa sunod tuig. Mahimong di pa mahuman sa pagsaulog sa ika-450 nga sumad sa pagkakaplag sa imahen ni Sr. Sto. Niño sa Abril 27, 2015. Gani, nikumpisal si Padre Jonas Mejares, rector sa Basilica, way makasulti niya kanus-a masugdan ang aktuwal nga pagpahiuli sa kampanaryo nga nahugno sa makalilisang nga linog niadtong Oktubre 15 sa niaging tuig.
Naa pa sa pre-restoration phase ang trabaho nga nagpadayon sud na ron sa dul-an sa tuig. Matod ni Mejares gisigehan na siya og apura sa mga deboto. Apan gipasabot siya sa mga eksperto nga di madali ang pagbanhaw sa bayhon ug kalig-on sa kampanaryo.
***
Unang nakabantay nga madugay ang trabaho mao ang mga inhinyero sa Department of Public Works and Highways. Silay gisugo nilang Presidente Noynoy Aquino ug Highways Secretary Rogelio Singson sa pagtabang sa kaparian pagpabarug sa kampanaryo sa labing daling panahon. Apan lahi ang plano sa National Historical Commission ug National Commission on Culture and Arts.
Ang paghipos sa nahugno nga bahin sa kampanaryo, nga alang sa DPWH mahuman lang sa pila ka oras, naabtan na ron og pila ka buwan. Niinsistir ang NHC ug NCCA nga numerohan, markahan ug letratohan ang matag tipaka nga makuha aron mauli sa ilang tukmang nahimutangan inig pabarug na og balik sa kampanaryo.
***
Nipalaban ang lokal nga mga opisyal sa DPWH ni Singson nga di sila makaagwanta sa kalangay sa trabaho. Apan gisugo silang Singson sa pagpadayon pagtabang. Hingpit silang nibiya dihang giingnan nga mahimong langyawng mga arkitekto ug inhinyero ra ang may igong kasinatian pagluwas sa makasaysayanong kampanaryo.
Arkitekto gikan sa Japan, nga mas lapad og kasinatian sa mas kusog ug mas daghang linog, ang nitambag sa kaparian nga kahoy, di puthaw, ang himuong haligi. Kay mas lubay ug mas makasugakod sa pagtay-og, nga di mameligrong mabungkag ang mga bato ug semento sa tigbayon.
***
Kay wa pa may klaro kanus-a mahuman ang pre-restoration ug kanus-a masugdi ang restoration, di pa sang kahatag og banabana ang mga eksperto sa kinahanglang gastuhon. Maong di pa sab kahibawo si Mejares pilay hinabang nga pangayuon. Masaligon hinuon siya nga di ihikaw sa mga deboto ang pagtabang pagpahiuli sa kampanaryo.
Di makabuot silang Mejares ug ang kaparian kay gideklarar mang National Historical Landmark ang Basilica. May bentaha hinuon: Ang NCCA maoy niabaga sa pre-restoration nga sa banabana ni Mejares nigasto na og P5 milyones. May iyang kaugalingong banabana si Mejares sa kinatibuk-ang gasto paghuman sa proyekto: P20 milyones. Nahadlok siyang mas dako ang aktuwal nga gikinahanglan. Mas nabalaka unsaon pagpasabot ang mga deboto kanus-a matino kanus-a mahumang trabaho.