Lifestyle check paspasan

Nindot kaayo kay magtinabangay na ang kadagkoan sa Department of Interior and Local Government, Bureau of Internal Revenue ug Ombudsman sa pagpahigayon og lifestyle check sa tanang opisyal ug mga sakop sa kapolisan.

Si DILG Secretary Mar Roxas mipahibalo niini human nga giaprobahan sa mga senador ang P104 Bilyones nga budget sa gidumala niya nga ahensya, apil na sa kapolisan, kabomberohan ug sa Bureau of Jail Management and Penology.

Matud ni Roxas nga mahinungdanon kaayo ang pagtinabangay sa mao nga mga ahensya uban sa National Police Commission aron mahimo'ng paspas ang kampanya batok sa mga polis nga nanag-iya og katigayonan nga nakuha gikan sa illegal.

Tinuod man g'yud, daghan kaayo nga mga polis nga naghinubra ang ilang katigayonan kon itandi nimo sa ilang suweldo. Aw hinuon, walay labot niadto'ng dunay mga negosyo nga nakapadugang sa ilang kakuwartahan.

Dili lang kay mga polis, daghan pa diha nga mga sakop sa law enforcement units nga makita nimo nga naghinubra na ang katigayonan sama sa pipila ka sakop sa Philippine Drugs Enforcement Agency.

Kon ari ka sa Bureau of Customs, labaw pa. Apan ingon man usab niini ang sitwasyon sa mga kawani sa BIR, ilabi na kadto'ng nadistino sa assessment division. Aw sumala gud, nahinumdom pa ba kamo niadtong opisyal sa BIR dinhi sa Sugbo nga gitaktak sa serbisyo tungod sa "unexplained wealth?"

Kini maoy rason nga malipay ko kon papaspasan ni Secretary Roxas ang pakigtinabangay sa kadagkoan sa BIR ug Ombudsman aron pangtaktakon na sa serbisyo kini'ng mga kurakot nga opisyal sa kapolisan ug sa DILG sa kinatibuk-an.

Unya apilon na lang 'sab kana'ng mga kawani sa BIR nga tuyuon nila pagpagamay ang bayranan sa buhis basta hatagan sila og kuwarta.

Ang lakang ni DILG Secretary Roxas paghimo og lifestyle check sa kapolisan nagumikan niadtong report nga mga polis, apil ang usa ka opisyal, nang-hold-up didto sa Manila.

* * *

Ang Team Rama nagtinguha nga mahulipan si Konsehal Margarita "Margot" Osmeña pagka chairman sa Committee on Budget and Finance sa Cebu City Council. Gusto ni Mayor Michael Rama nga si Konsehal Noel Eleuterio Wenceslao maoy ihulip ni Margot.

Gitug-anan ko ni Konsehal Wenceslao nga sa wala pa molarga si Mayor Rama paingon sa Sabrosa City, Purtugal sa miagi'ng semana, gipakigsultihan siya ug gisukna kon mahimo ba nga siya ang modumala sa budget and finance committee.

Matud ni Wenceslao nga giingnan niya ang mayor nga kon maoy kabubut-on sa mga kauban niya'ng konsehal andam niya kini nga dawaton kay isip usa ka certified public accountant makamao siya sa mao nga trabaho.

Bitaw, isip beterano nga reporter sa City Hall nakasabot ko ngano nga gusto g'yud ni Mayor Rama nga ang mohupot isip chairman sa budget and finance committee iyang alalay kay aron dili supakon pananglit moduso siya og daku nga budget.

Nakasabot usab ko sa baruganan ni Konsehal Osmeña nga dili man mosupak kon daku nga budget ang isumiter sa mayor basta makapasalig lang ang city treasurer nga ang mao nga kantidad makolekta g'yud.

Apan ang nakadaut lang kay base sa history sa revenue collections sa Cebu City government atol sa administrasyon ni Mayor Rama dili kaayo dagko ang koleksyon, bisan og iapil pa ang Internal Revenue Allotment.

Pagka karon lang gani nga ang budget P5.8 Bilyon lang, ang nakolekta sa city treasurer's office subra pa lang og gamay sa P4 Bilyones. Duha-duhaan pa kon ang P5.8 Bilyones ila ba nga makolekta.

Sa ako na nga gibalik-balik pag-ingon nga daghan kaayo nga mga buhis nga kolektahonon dinhi sa dakbayan sa Sugbo, apan ang problema mao ang kahinay sa pagpangolekta.

Alang kanako, bisan pa og dili kaayo dako ang isugyot sa mayor nga Annual Budget walay problema kay kon makakolekta ang mga tax collectors og subra sa mao nga kantidad, mahimo man nga moduso og dugang budget.

Mag-unsa man kon dako kaayo nga budget ang aprobahan unya dili diay makolekta ang kinatibuk-an nga kantidad, nagpasabot nga dili lang gihapon mapatuman ang mao nga mga proyekto.