Tubag sa baha
Kon itandi sa Sugbo ug Metro Manila, mas dako ang problema sa baha sa Tokyo ug ubang dakbayan sa Japan. Inay magsige lang og padako sa ilang mga imburnal, nga maoy gihimo sa Sugbo ug Metro Manila, nagtukod ang Japan og tangke sa tubig ilawom sa yuta nga maoy labing dako sa tibuok kalibotan. Inay ipadayon nato ang wa magsilbi nga naandang mga sulbad sa baha, mas maayo tingaling atong tun-an ang mas epektibong proyekto sa Japan.
Ang higanteng tangke sa tubig nga mas taas pa kay sa lima ka andana nga building gitukod sa Kasukabe, Saitama, Japan. Di madanihon ang iyang ngan, Metropolitan Area Outer Underground Discharge Channel, apan hingpit nga nasulbad ang baha sa Japan.
***
Naabtan ang Japan og 17 ka tuig paghingpit sa proyekto, gikan sa 1992 hangtod sa 2009. Nagtukod sila og lima ka sementadong istruktura nga may gihabugon nga 65 ka metro ug gidak-on nga 32 ka metro, nga gisumpay pinaagi sa 6.4 ka kilometro nga tunnel, ug higanteng tangke nga may gihabugon nga 25.4 ka metro, gitas-on nga 177 ka metro ug gilapdon nga 78 ka metro, may 59 ka dagkong haligi ug 10 ka higanteng bomba nga makahabwa og hangtod 200 ka tonelada nga tubig ngadto sa silingang suba sa Edo matag segundo.
Nisugyot og susamang proyekto si Tommy Osmeña dihang siya pa ang mayor sa Dakbayan sa Sugbo. Apan inay usa ka higanteng tangke, nisugyot siya og duha: Usa sa ilawom sa South Road Properties (SRP) nga maoy mosuyop sa tanang tubig gikan sa mga barangay sa habagatang bahin sa Dakbayan sa Sugbo; ug lain ilawom sa St. John Paul II Avenue (kanhi San Jose dela Montana) nga maoy motigom sa tanang uwan sa mga barangay sa amihanan.
***
Sama ni Osmeña, kumbinsido sab si Highways Secretary Rogelio Singson nga ang pagbutang og higanteng mga tangke sa tubig ilawom sa labing ubos nga mga bahin sa Metro Manila maoy labing epektibong sulbad sa baha sa kaulohan. Alang ni Singson pag-usik-usik lang ang padayong paggasto og binilyon ka pesos pagpadako sa drainage system.
Lahi ni Osmeña, may aktuwal nang kasinatian si Singson sa pagtukod og tangke sa tubig ilawom sa yuta. Dihang dako pa siyang haligi sa pribadong sektor, nakatukod na siya og dakong tangke sa tubig. Karon naa na siya sa labing maayong posisyon sa pagsuway sa sulbad alang sa mas dakong suliran.
***
Paminawon ba ni Mayor Mike Rama ang sugyot sa higpit niyang kaatbang? O ipadayon ang pagsige og pasalig ug pagpaundayon sa naandang padagkoay sa mga imburnal?
May igo bang kuwarta ang dakbayan? Motampo bang mas dakong puntil sa nasudnong gobyerno? Palabihon na bang interes sa publiko o pamolitika lang gihapoy ipatigbabaw?
- Latest
