Pagpalambo sa kapolisan

Way mga polis sa Sugbo ug Central Visayas nga gikasohan sa pagpanulis ug pagpanagit. Mao ni ang taho sa National Police Commission sa rehiyon ngadto sa ilang ulohang buhatan nga nagsusi may mga polis ba sab sa ubang bahin sa Pilipinas nga, sama sa pipila ka polis sa kaulohan, gidudahang apil sa sindikato nga nahilambigit sa "hulidap."

Matod ni Atty. Homer Mariano Cabaral, regional director sa Napolcom 7, kasagaran sa mga kaso nga nag-ung-ong ron sa ilang buhatan gipasaka batok sa mga polis nga gipasanginlang nakapasakit sa ilang mga dinakpan. Gimandoan sila sa paghingpit paghusay sa mga kaso sa labing daling panahon.

***

Bisan sa pagpasaka og mga kasong kriminal batok sa pipila ka sakop sa Highway Patrol Group (HPG) nga gipasanginlang naapil sa pagbanhig ug pagpatay sa inilang abogado sa Sugbo nga si Noel Archival, nitaho si Cabaral nga mas gamay ang mga reklamo batok sa kapolisan sa Sugbo, Bohol, Negros Oriental ug Siquijor kon itandi sa ubang bahin sa nasud.

Gipasidunggan ni Cabaral ang kakugi ug kaisog sa mga sibilyan sa pagbarug batok sa abusadong mga polis pinaagi sa pagdangop sa media o pagpasaka gyod og mga kaso. Mao ni nakita sa Napolcom nga usa sa mga hinungdan nganong mas mabinantayon na ang kapolisan sa pagtuman sa ilang trabaho.

***

 Laing gitutokan sa Department of Interior and Local Government mao ang paghimong mas paspas ug mas hapsay sa paghusay sa mga kaso batok sa mga polis. Niangkon si Cabaral nga makalibog ang sistema karon nga mahimong pasakaan og mga kaso ang kapolisan atubangan sa Napolcom, o People's Law Enforcement Board, o Ombudsman for the Military and Other Law Enforcement Offices, o sa Philippine National Police o uban pang mga buhatan.

Matod ni Cabaral pipila sa kausaban mahimo ra sa Napolcom. Apan ang mas lapad ug malungtarong kabag-ohan sa sistema magkinahanglan og lab-as nga mga balaudnon sa Kongreso.

***

Nagpakitabang ang Napolcom 7 sa mga mayor sa mga dakbayan ug kalungsoran aron pagtino nga mabaraw dayon ang sungayan nga kapolisan. Nakigtagbo sila sa mga mayor sa tibuok rehiyon aron pagpahinumdom sa dagko nilang gahom pagdisiplina sa badlungon nga mga polis sa labing sayon ug laktod nga paagi.

Gipahamtang sab sa Napolcom ang bag-ong panginahanglan sa di pa ma-promote pagka hepe sa police station si bisan kinsang opisyal: Kinahanglan sila nga mopaubos sa tinuyo nga pagbansay-bansay unsaon pagpalambo sa katilingban. Gipanghinaot nga ang mga hepe ug ang kapolisan sa mga dakbayan ug kalungsoran magsugod na pagtan-aw sa ilang kaugalingon di lang nga tigbadlong sa mga kriminal kon dili isip katambayayong sa paglambo sa katawhan sa tanang aspeto sa inadlaw-adlaw nilang pagpuyo.