Lagda sa gasto
May batakang lagda sa pagduma og panalapi nga angayng makat-onan ni Cebu City Mike Rama: Ang magbalikbalik nga gasto kasustinihan lang pinaagi sa magbalikbalik nga kita; ang di magbalikbalik nga kita, bisan unsa kadako ug bisan unsaon og matik-matik, mahurot ra ug di mahitabong makalahutay pag-abaga sa magbalikbalik nga gasto.
Mao ni sulti ni kanhi mayor Tomas Osmeña sa iyang pagpasidaan nga ang gikuwenta nang daan ni Rama nga dakong halin sa pipila ka luna sa South Road Properties maoy gamiton sa tinuig nga mga gastohan sa City Hall. Mao ni sukaranan sa pasidaan ni Osmeña nga kon di mabadlong ang pamolitika ni Rama mabangkarota gyong dakbayan.
* * *
Simbako isalikway lang ni Rama ug sa iyang mga dumadapig ang lagda nga gihisgotan ni Osmeña, nihatag siya og yano nga pananglitan: Dakong sayop ang pagbaligya og relo aron ipalit og cell phone. Kay samtang kausa rang mopalit og cell phone, kinahanglang magpa-load matag karon ug unya o mobayad matag buwan aron magpabiling buhi ang linya. Kon mahurot nang halin sa relo ug wa na kay laing tinubdan nga ipalit og load mawad-an na og kapuslanan ang cell phone.
Matod ni Osmeña mao ni nahitabo sa panalapi sa dakbayan ubos ni Rama: Gilumpong ni Rama ang tanang kita ug gigasto sa bisan unsa na lang gastohan nga iyang mahunahunaan.
* * *
Andam na hinuon ang tubag ni Rama: Tanang kuwarta nga iyang gigasto nadawat sa katawhan nga nakapahimus sa financial assistance ug nakit-an sa katawhan sa iyang gipasiugdahang mga proyekto. Masaligon ang mayor nga di siya kapasanginlan nga nangawat o nagwaldas sa buhis kay nabantang sa tanan unsay iyang gigastohan.
Tinuod nga daghang nabuhong sa pamunoan ni Rama. Nagbaha ang financial assistance ngadto sa senior citizens, mga opisyal ug mga kawani sa kabarangayan, mga magtutudo, katawhan nga may kakulian ug ubang sektor. Mao ni sukaranan sa mga pangagpas nga mas katuohang mapili si Rama sa ikatulong sunudsunod nga termino kay sa makabalik si Osmeña sa City Hall.
* * *
Niangkon si Osmeña nga lisod pildehon ang matang sa pamolitika ni Rama. Apan di siya mahimong magpakahilom kay di siya gustong tulisukon sa mga Sugbuanon nga nagkuwang siya sa pagpasidaan nila. Nisubli si Osmeña pagpasangil nga ang pag-apura ni Rama pagbaligya sa SRP aron lang makalahutay sa taphaw'ng mga gastohan aron modaog siya sa sunod nga piniliay bahala nang kaugmaon sa mga Sugbuanon.
Matod ni Osmeña kon masublian si Rama sa 2016 kutob ra sa 2019 ang kataposan niyang termino. Nipuno siya nga makaluluoy ang sunod nga mayor nga maoy makasapupo sa gimugna ni Rama nga magbalikbalik nga gastohan ginamit ang halin sa mga luna sa SRP nga di na mahimong ibaligya pag-usab.
- Latest
