MIP Building, MCIA, Lapulapu City -- Sa labing unang higayon, nagkaatubangay ang kadagkoan sa transport groups sa Sugbo ug sa Land Transportation Franchising and Regulatory Board ug Land Transportation Office pagtuki sa labing kontrobersiyal nga mga probisyon sa Joint Administrative Order sa Department of Transportation and Communication.
Narepresentahan dinhi ang hapit tanang transport groups sa Sugbo. Wa hinuon kong kakita sa Piston ug ubang militanteng mga pundok nga kusganong niawhag pagbasura sa JAO. Nakatambong sab ang tanang komisyonado sa LTFRB nga gipangulohan ni Chairman Winston Gines ug ang mga tagduma sa LTO nga gipangulohan ni Assistant Secretary Alfonso Tan Jr.
* * *
Way kauyonan nga naumol. Apan pagkahuman sa tibuok buntag nga binayloay sa nagkasungi nga mga baruganan, napapas ang tensiyon nga nihakop sa industriya sa transportasyon human sa pagpatuman sa JAO niadtong Hunyo:
•Morang gihuwasan ang kadagkoan sa transport groups human nakapabuhagay sa tanan nilang kahiubos, kalibog ug kabalaka sa kadagko sa gipahamtang nga mga multa ug sa kamakiangayon sa pagpatuman sa mga lagda; ug
•Klarong nahinangop ang kadagkoan sa LTFRB ug LTO sa kamahigalaon sa Sugbuanong transport leaders, isog ug determinado ang mga argumento apan malaumon nga paminawon sila ug tinud-on pagsubli ang ilang gisupak nga mga probisyon ug himuon ang labing tukma nga kausaban.
* * *
Niang pipila sa talagsaon nga mga timaan sa kabukas sa panghunahuna sa tanang hingtungdan nga nitumaw atol sa dialogue:
•Si Richard Cabucos, presidente sa Metro Cebu Taxi Operators Association, nagpatambag sa kadagkoan sa LTO ug LTFRB unsay ilang ikatanyag nga bansay-bansay aron nga madisiplina nang ilang mga drayber;
•Si Romeo Armamento, bise presidente sa National Transport Workers Union, nangayo sa pagsabot sa mga mananakop kay may kaubanan silang drayber nga di dayon makasabot sa dagkong kausaban sa mga lagda sa trapiko; ug
•Si Tan nikumpisal nga di una nila ipatuman ang tanang probisyon sa JAO ug wa pa silay deputized agents kay di gustong gamiton sa pangurakot.
* * *
Angayng ihatag ni Kongresista Raul del Mar ang labing dakong kredito sa pag-abot sa nagkasungi nga mga sektor. Ang iyang pagkumbinser ni Transportation Secretary Emilio Abaya pakigtagbo sa transport leaders sa Sugbo maoy nakapugong sa nasudnong welga sa transportation niadtong Hulyo. Lahi sa paukyab sa ubang politiko nga way nahimo paghusay sa panagsungi.
Maong di mabasol si del Mar nga, dihang gitak-opan nang dialogue dinhi, nipahinumdom sa transport groups pagpahimus sa presensiya sa labing dagkong mga opisyal sa LTO ug LTFRB. Dali rang nahuman ang tigom kay ang drivers ug operators wa maglibutlibot, nidiretso sa gikuwestiyong mga probisyon. Wa pa hinuon mahumang tahas ni del Mar. Gipalihug siya sa transport leaders pagtino nga masukip ang ilang mga sugyot sa pagsubli ug posibleng pag-usab sa JAO.