Eksperimentong binuang

Bisan napamatud-an na nga sayop ang eksperimento ni Cebu City Mayor Mike Rama sa pag-usab sa mga lagda sa trapiko sa Banilad-Talamban Corridor, ipadayon lang gihapon sa pagpatuman sa City Traffic Operations Management ug Cebu City Police Office.

Bisan nabantang na ang makadaot nga sangpotanan sa eksperimento ngadto sa tanang motorista ug mga pasahero, gawas lang tingali sa mayor ug sa iyang mga batabata nga nilingiw sa pikas nga direksiyon matag kakita sa nabara nga trapiko ug niisip sa natanggong ug nalangay nga mga sakyanan nga timaan sa ilang kalamposan, ipadayon lang gihapon sa City Hall ang binuang nga kalihokan.

***

Paminawa ra god ang katin-awan sa mabuot unta nga mga magtatambag ni Mayor Rama sa ilang bulilyaso sa Ban-Tal:

•           Si Bunny Pages, ang gitahasan ni Rama                                 pagpasabot sa eksperimento ngadto sa mga               negosyante ug pribadong sektor, nipasabot sa                        Tubag! sa ABS-CBN ug DYAB nga nagmugna                         ang mayor og krisis aron pagdapit sa mga                  Sugbuanon sa kaseryuso sa problema; ug

•           Si Ruben Almendras, ang tsirman sa Citom,              nitug-an sa mga nanambong sa konsultasyon nga                  gipatawag ni Rama upat ka adlaw human ilusad                    ang eksperimento, nga igo lang gihatagan sa             mayor og "shock treatment" ang mga Sugbuanon                  aron pagpahapsay sa trapiko sa Ban-Tal.

***

Pasayloa, apan ang akong hubad sa tinuod nga gipasabot nilang Pages ug Almendras mao ni: "Sayop si Mayor Rama apan unsa may atong mahimo nga siya man ang tagduma sa dakbayan. Nisamot ang kaguliyang sa trapiko apan wa mi mahimo pagbadlong niya kay kumbinsido siya nga makaayo ang eksperimento."

Pait nga kamatuoran mao nga gilusad ni Rama ang eksperimento nga wa mangonsulta ni bisan kinsa. Bisan ang Citom wa dayon kaandam sa tukmang traffic signs. Ambot unsay nakaaghat niya apan naumol ni Rama ang eksperimento sa lawom nang gabii sa niaging Dominggo. Ug di siya interesadong maminaw og sukwahi nga baruganan, samang iyang gipahilom ang tanang nisuway pagsukwahi niya sa konsultasyon unta niadtong Biyernes.

***

Ligdong nga mga higala ni Rama wa magkuwang pagtambag niya unsaon pagpalambo ang dakbayan. Samtang di pa siya sama ka-arogante ni kanhi mayor Tommy Osmena, namatikdan nila ang kinaham niyang tubag pagsalikway nila: Siya ang gipili sa mga Sugbuanon nga mayor samtang sila wa gani kadaog pagka barangay kapitan.

Mao ni posibleng katin-awan nganong gilingug-lingogan ni Rama ang sibaw nga mga pagsaway sa iyang eksperimento sa Ban-Tal. Bisan sinaligan niyang mga magtatambag di ka-ek kay wa man tinuod sila mapili sa mga botante sa bisan unsang katungdanan. Apan ang mga motorista ug mga pasahero nga natanggong sa Ban-Tal di angayng motak-om. Angay nilang pahinumdoman si Rama nga sila ang mga magbubuhis nga nagsuweldo niya ug busa angay niyang tahuron.

***

Email: [email protected].