Kamingaw sa prisohan

Bisan sa kahagip-ot ug kaalimuot sa iyang selda, lingaw pa kaayo si Senador Bong Revilla sa unang mga adlaw sa iyang pagkapriso. Kay hapit tanan niyang lihok ug kasinatian sud sa selda--apil nang pila ka oras ang iyang katug ug unsay iyang sud-an--gibalita sa mga sakop sa media ug gisumsoman og mga komentaryo sa iyang mga dumadapig ug mga kaatbang.

Apan ang tinuod nga epekto sa iyang pagkapriso inanay nga mabatyagan ni Revilla sa labing mingaw nga mga takna sa kagabhion nga wa nay laing nagtikaw-tikaw. Wa nay nagtan-aw nga sakop sa iyang pamilya. Bisan ang mga guwardiya maanad nang artista ang ilang piniriso ug makakita og laing mas mahinungdanong kalingawan.

* * *

Hingpit nga mapugwat si Revilla sa kapait sa bilanggoan sa mosunod nga mga adlaw. Kanus-a inanay nang mawad-an og interes ang media ug publiko sa iyang kahimtang. Labi na kon may mas gamhanan ug mas kontrobersiyal pang mga sinumbong sa pork barrel scandal nga mabalhog na sab sa prisohan.

Mahibalik lang ang pagtagad sa katawhan niya kon, ug tingali mao ni unod sa iyang mga pangaliya, matuman ang sugyot nga magtapad sila og selda si Senador Jinggoy Estrada (kon di tumanan sa iyang demanda nga magpa-house arrest) ug Senador Juan Ponce Enrile (kon di hatagan og pabor ang kahinog sa iyang pangedaron).

* * *

Hinaot nga karong nakatilaw na si Revilla sa grabeng kaalimuot sa mga lawak ug dapit nga way aircon, makabatyag na siya og tinuod nga simpatiya natong kasarangan nga mga konsumidor sa kuryente. Nga ilang gibaligya sa higanteng mga kompaniya pinaagi sa pagtugot sa way pupanaganang pagsaka sa bayranan sa kuryente.

Hinaot sab nga mas mabatyagan na niya ang tinuod nga kaluoy sa kaigang sa mga anak sa singot nga igo lang maglaway sa nangamig sa katugnaw niyang mga buhatan ug mga pinuy-anan. Daghang salamat sa iyang pagtabang paglansang sa ubos kaayo nilang inadlawng suholan ug mga benepisyo.

* * *

Di mahitabong langayon ang husay sa mga kasong plunder ug pagpangawkaw batok nilang Revilla ug ubang mga sinumbong. Kon ang prosekusyon maoy pabut-on, angayng tiwason ang husay ug hukman ang mga kaso sa di pa mapupos ang termino ni Presidente Noynoy Aquino sa Hunyo 30, 2016. Ang bisan unsang kalangay mahimong maggikan sa mga abogado sa mga sinumbong nga di mabasol nga maglaom nga mas mahigalaon nila ang mobanos pagduma sa Malakanyang.

Hinaot nga bisan unsa kamubo sa iyang pagkatanggong, makasabot si Revilla sa kalisod sa pagpaabot sa hinayng tuyok sa ligid sa hustisya. Labi na kon inosente sa pagkawagtang sa minilyon ka pesos niyang pork barrel. Hinaot nga kon makabalik pa sa Senado gahinan og mas dakong panahon kay sa paghimo og MTV ang pagpalambo sa sistema sa hustisya.

* * *

Email: [email protected]