Titulado ang Canduman Road

May dakong problema ang proyekto sa nasudnong gobyerno pagpalapad sa Canduman Road sa Mandaue City: Titulado sa pribadong indibiduwal ang bukana nga nagsumpay sa dan ngadto sa mas dakong Cebu North Road. Wa ka masayop sa imong nabasa. Di gobyerno maoy nanag-iya di lang sa masig ka daplin sa Canduman Road. Kon di sa dakong bahin sa dan mismo.

Bisan ang naghupot sa titulo sa luna nga si Pancracio Alinsug wa kasabot nganong wa mabalhin sa gobyerno ang pagpanag-iya sa luna nga gihimoan sa dan. Igo lang napanunod ang luna gikan sa iyang amahan. Nagduda siya nga wa lang magpakabana ang gobyerno tungod sa kadugay nang natukod sa dan.

***

Ang paghimong upat na ka lanes sa Canduman Road maoy nakita nga usa sa mga sulbad sa subsob nga mga aksidente nga nahitabo sa kinasang-an sa tulo ka dagkong bul-og sa mga sakyanan: Una, ang naglugsong nga mga sakyanan gikan sa amihanang Sugbo; ikaduha, ang nagtungas nga mga sakyanan gikan sa Mandaue City proper; ug ikatulo, ang nagtungas ug naglugsong nga mga sakyanan gikan ug paingon sa Cebu City agi sa Canduman.

Apan nalangay og pila na ka buwan ang expansion project. Nahadlok ko nga sama sa komplikasyon sa pagpanag-iya sa bukana wa pa sab makuha sa DPWH ang right of way sa kadaplinan sa ubang bahin sa Canduman Road.

***

Nakigkita nang Alinsug ang kadagkoan sa DPWH aron pagpahibawo nga maapektahan ang iyang kabtangan sa pagpalapad sa dan. Gida pa gani siya sa buhatan sa DPWH sa ikaunom nga distrito. Gipakita silang Alinsug sa iyang titulo. Di lang sa kadaplinan kon dili hangtod 200 ka metro sa dan gikan sa eskina sa Cebu North Road.

Gipasaligan sa lokal nga mga opisyal sa DPWH si Alinsug nga ang district office maoy mobayad sa luna nga makuha sa expansion ug ang nasudnong buhatan maoy mobayad sa mas dakong luna nga gihimong dan. Apan way bisan usang opisyal nga naghisgot og presyo.

***

P10,000 matag metro cuadrado ang banabana ni Alinsug sa presyo sa luna. Apan wa siyay laraw paglisudlisod sa gobyerno. Andam siyang makig-abot sa labing makiangayong presyo. Wa sab maghunahuna si Alinsug pagbawi sa kabahin sa Canduman Road nga iyang gipanag-iya. Wa gani siya mosupak dihang gitibhangan sab ang laing bahin sa iyang luna habig sa Cebu North Road dihang gitukod ang skywalk ni kanhi kongresista Nerissa Soon Ruiz.

Wa lang ganahi ni Alinsug mao ang pagpanghudlat sa demolition team sa Mandaue pagguba sa mga tindahan nga nag-abang sa iyang luna. Ambot nganong way nagtagad sa pagbayad sa kabahin sa luna ni Alinsug nga hagbay rang napahimuslan sa publiko ug sa dugang luna nga gikinahanglan pagpalapad sa Canduman Road.

***

 Email: [email protected]