Kainit ug tulis sa presyo

Kon ganahan kang makasinati sa kinagrabehan nga epekto sa nagpadayong ting-init, palihug suwayi og sakay ang Ocean Jet. Kadaghan na ko mabiktima sa gikaintapan nga kainit sa ilang fast craft apan way makalabaw sa kahasol nga nahiagoman namong mga pasahero sa ilang biyahe gikan sa Tagbilaran City sa Bohol paingon sa Cebu City niadtong Lunes sa hapon.

Di hingpit nga puno ang Ocean Jet 8 kay may pipila pa man ka lingkoranan nga bakante. Apan sukad sa among pagsakay dayong alas-2 sa hapon hangtod sa pagkawas pasado alas-4 sa hapon natanggong mi sa labihang kaalimuot, nag-abot ang gihilantan namong gininhawa, samtang naglapotay sa singot ang among lawas.

***

Gitataw sa mga pasahero nga nag-una namo nga alimuot nang daan pagsud nila maong nireklamo dayon ngadto sa mga tripulante. Nga igo lang nipasalig nila nga mobugnaw nang aircon kon makalarga na. Nakabuylo nang fast craft apan wa mi nabatyagan bisan gamay na lang nga bugnaw. Gawas sa hinay ug tagsang hapuhap sa hangin gikan sa mga katapad namo nga kugihan nga namaypay.

Nihangyo ang pipila ka pasahero nga ablihan na lang ang mga bintana aron nga gawas nga may makasud nga hangin makahungaw ang nagpuot nga kainit gikan sa sud. Apan igo lang silang giingnan nga gidili sa mga lagda ang pag-abli sa mga bintana kay maapektahan ang dagan sa fast craft.

***

Ambot nganong wa maapil sa gidili sa Martime Industry Authority ang paghimong hurnohan sa aircon unta nga tourist class accommodation. Bisan sa kasibaw na sa mga reklamo sa mga pasahero wa gyoy kisaw ang Marina bisan ek na lang.

Bugtong katin-awan sa padayong pangiyugpos sa Marina sa mga reklamo batok sa Ocean Jet mao nga mas mahinungdanon ang pagpatuman sa mga lagda batok sa pagsera sa mga bintana sa fast craft kay sa paghimo og batakan nga mga lakang pagpanalipod sa kahimsog sa mga pasahero.

***

SuperCat maoy among gisakyan paingon sa Tagbilaran niadtong Lunes sa buntag. Pila ra ming pasahero. Gawas nga luag ang mga lingkoranan haskang bugnawa pa gyod sa ilang aircon. Apan sa di pa manghambog ang management, masulub-on kong mopahibawo nimo nga gawas nga makapainit makapasurok pa gyod sa dugo ang ilang mga presyo.

Kay wa man ming kapamahaw, nangita mi og pagkaon dihang nakalarga nang fast craft. Nakugang mi sa presyo sa ilang sandwich: P90 para sa tulo ka gagmay kaayong piraso sa slice bread nga gihugaw-hugawan og mayonnaise. Makagaba gyod tingali ang ginansiya. Kay ang mas dagko nga sandwich nga gipamaligya sa mga tindahan sud sa tolda-tolda pa hangtod karon nga passenger terminal sa Tagbilaran tag P45 ra. Hinaot nga wa ipatong sa presyo sa sandwich ang nabakante nilang mga lingkoranan.

***

Email: [email protected].