Makabawi na bang Pacers?

Daghang nanghuy-ab dihang ang Atlanta Hawks, inay ang New York Knicks, maoy nakasud sa playoffs. Kay way bisan usang nagduda, gawas lang tingali sa lunod-patay nga mga dumadapig sa Hawks, nga ihawon sila sa numero uno nga team sa Eastern Conference karong tuiga. Nailog kadiyot sa defending champions Miami Heat ang liderato apan ang Indiana Pacers gyoy nakalingkod sa trono sa regular season.

Dihang nidaog ang Hawks sa unang duwa, napugwat ang tanan. Gisubay ang pagtibugsok sa Pacers human sa All Star break. Gitumbok ang panagsungi sa mga magduduwa ug ang kahigayonan nga mapalagpot ang ilang head coach. Bisan nakakapyot ang Pacers pagpugos og Game 7, nabisto nang dako nilang buslot.

***

Human gipugos sa Pacers silang Lebron James ug kaubanan pagduwa og Game 7 sa East Finals sa niaging tuig, si Heat President Pat Riley nilusad dayon sa Greg Oden experiment. Usa ray tahas nga iyang gisangon sa 7-footer nga si Oden: Ang pakigbangga sa higante sa Pacers nga si Roy Hibbert, 7'2".

Apan sa unang engkuwentro sa Heat ug Pacers sa regular season, gikilaw dayon ni Hibbert si Oden. Maong gipalingkod si Oden ug hilom nga giangkon ni Riley nga pakyas ang iyang eksperimento. Modaug o mapilde sa Game 7 ang Hawks, segurong may dakong gasa pasalamat silang madawat gikan sa Heat.

***

Bisan sa pagdaog sa Pacers batok sa Hawks, 95-88, sa Game 6, nagpakauwaw gihapon si Hibbert: Mas daghang fouls (4) kay sa puntos (0) ug rebounds (2). Daghang pangagpas sa nahitabo niya: Gikapoy na; o nisud sa ulo nga All Star siya; o lubay lang gyud og panghunahuna.

Mas katuohan hinuong basa sa tinuod nga mga eksperto. Nasakpan sa Hawks ang kahuyang ni Hibbert. Maglisod siya pag-apas kon gikan sa gawas ang itsa sa bolsa sa mga dagko sa Hawks. Labaw sa tanan, nahawan ang ilang goal maong kuwang na lang og diyutay nga magpatintero silang Jeff Teague ug kaubanan sa sud.

***

Mas malampuson ang Pacers sa Game 6 dihang gipaduwa lag kadiyot si Hibbert dayon gipulihan sa mas gagmay nga silang Ian Mahinmi ug Chris Copeland. Gitataw hinuong Pacers Head Coach Frank Vogel nga di mahimong hingpit niyang ibangko si Hibbert. Kay kon makasud sila sa East semifinals, si Hibbert ray makasakbang sa mga higante sa Washington Wizards nga silang Nene Hilario ug Marcin Gortat.

Bisan sa pasiunang kaapiki, Pacers gihapoy gipaboran nga maka-abante sa East finals aron ikaabot pag-usab ang Heat. Nga mas daghan og maggamit kay sa Hawks pagbuslot sa depensa sa Pacers ug pagbira ni Hibbert ngadto sa gawas. Mao ba ni hinungdan nga nagsige na og baid si Chris Bosh sa iyang three-point shots?

***

Email: [email protected]