Seguridad ni Sr. Sto. Niño

Kon nagreklamo ka sa kalisod sa pagkuyog sa solemneng prosesyon sa imahen ni Sr. Sto. Niño matag bisperas sa iyang piyesta sa Dakbayan sa Sugbo, tan-awa ang kaguliyang ug kadaghan sa naangol sa matag traslacion sa imahen sa Black Nazarene sa Manila. Dul-an sa duha ka libo ang naangol, may usa nga naputlan og tudlo ug kasagaran nasamad ug napangos, sa 19 ka takna nga prosesyon niadtong Huwebes.

May mga kabalaka nga mao sab ni mahitabo sa prosesyon dinhi sa ato. Apan human sa 449 ka Piyesta Senyor, makapasigarbo ang mga Sugbuanon nga gawas sa naandang duut-duot sa mga manguyog ug pagkabara sa mga karosa way mas grabeng kaguliyang nga nahitabo.

***

Si Atty. Paul Yabao, consultant sa Basilica del Sto. Niño alang sa Piyesta Senyor karong tuiga, nangagpas nga ang pagpatigbabaw sa ka-solemne sa tinuig nga prosesyon dinhi sa ato naggumikan sa hingpit nga pagtugyan sa pagduma sa kalihokan ngadto sa kadagkoan sa Simbahang Katoliko. Matod niya way politiko ni lokal nga opisyal nga nangahas sa pag-usab sa naandan.

Si Padre Jonas Mejares, rector sa Basilica, nipasalamat sa hingpit nga pagtabang sa local government units, sa Philippine National Police, sa Central Command ug sa pribadong sektor sa tanang kalihokan sa Piyesta Senyor. Kon wa pa ang talagsaong pasundayag sa panaghiusa segurong magkapuliki sa higanteng tahas ang mga tigpasiugda.

***

Nikumpisal si Yabao nga di sayon ang pagpanalipod sa karosa nga gisakyan sa urna sa imahen ni Sr. Sto. Niño gikan sa bagang duot sa katawhan nga gustong mohawok, mohikap ug bisan mopaduol lang aron pagkaway-kaway sa ilang mga kamot. Gitumbok niya ang kinatibuk-ang kahapsay ngadto sa mga tigpasiugda nga bisan sa lapad nang kasinatian sa tinuig nga kalihokan wa gihapon mokumpiyansa.

Matod niya labing menos 500 ka marshalls --nga naglakip sa blue guards nga giboluntaryo sa nagkalainlaing security agencies ug mga polis ug mga barangay tanod-- ang naglibot sa karosa aron pagtino nga di malutsan ug makatkat ni bisan kinsang mangahas sa pagbalda sa prosesyon.

***

Gihinumdoman ni Yabao nga may prosesyon nga nabara sa Gen. Maxilom Avenue, wa na gyong kairog bisan usa na lang ka pulgada ang karosa ni Sr. Sto. Niño kay ang nag-una nga mga deboto pulos nanghunong ug naningkamot nga makapaduol sa imahen. Sa wa pa moulbo ang kaguliyang, giusab sa marshalls ang ilang formation, gitalinis ang atubangang bahin sa karosa ug hinay-hinay nga giiway ang bagang duot sa katawhan.

Mas seryuso ang nahitabo sa mas karaang prosesyon, niadtong katuigan nga ang orihinal nga imahen ang gisakay sa karosa. Tungod sa kahuot sa mga deboto, diriyot matagak ang imahen sa dayong kanaog sa karosa. Sukad niadto wa na tuguti sa kaparian nga makagawas sa basilica ang orihinal nga imahen.

***

Email: [email protected]