Wa mapasagdi ang Bohol

Napapas ang bisan unsa nakong pagduda nga nakalimtan nang mga biktima sa linog sa Bohol kay natingob nang atensiyon sa gobyerno ug pribadong sektor ngadto sa mas daghang biktima sa bagyong Yolanda. Dihang nakita nako ang nagtumpi nga sinakong bugas ug ubang pagkaon sa Dakbayan sa Tagbilaran nga andam nang i-apud-apod sa mga lungsod nga labing naggusbat sa linog.

Di kong katuo sa gidak-on sa putos sa pagkaon alang sa matag pamilya--20 ka kilong bugas humay, 10 ka latang sardinas, 10 ka latang beef loaf, 10 ka putos nga noodles ug 10 ka putos nga kape. Igo gyod alang sa 15 ka adlaw nga konsumo.

***

Duha ka dapit sa Tagbilaran ang gihimong repacking areas. Ang bugas gi-repack sud sa Camp Esteban Bernido ubos sa pagduma sa World Food Programme ug ang mga delata gi-repack sa Bohol Cultural Center ubos sa pagduma sa Department of Social Welfare and Development. Laing nipaluyo sa proyekto mao ang Australian Agency for International Development.

Gibanabana nga labing menos 600 ka sakong bugas humay ang ma-repack sa Camp Bernido matag adlaw. Magpulipuli lang ang dagkong trak nga mohatod sa sinakong bugas gikan sa nagkalainlaing bahin sa Kabisay-an ug Mindanao paingon sa kampo ug ang mga trak nga mohakot sa gi-repack nang bugas ngadto sa kalungsoran.

***

Nakatabang sa kapaspas sa operasyon ang pagtanyag sa WFP ug AusAID og suholan ngadto sa mga nitabang sa repacking. P275 ang madawat sa matag usa nga mamutos sa tibuok adlaw. Lainlaing hugna ang mga mamutos matag adlaw. Gihatag sa unang kahigayonan ang mga biktima sa linog. Ihatag ang ilang suholan matag tapos sa adlaw. Aron nga maggamit dayon alang sa inadlaw-adlaw nga mga panginahanglan sa ilang pamilya.

Lahi sa relief operations nga gipadagan sa lunlon mga boluntaryo, sama sa among Kapamilya Relief Campaign sa Sugbo, mas seryuso ang operasyon sa WFP. May langyaw sang tagduma nga magsige og suhid sa kinatibuk-an nga trabaho sa tibuok gyong adlaw hangtod sa tungang gabii.

***

Kapin sa 55,000 ka pamilya ang nakadawat sa abundang hinabang nga pagkaon. Nahimutang sila sa 17 ka lungsod nga labing naggusbat sa linog--Antequerra, Balilihan, Buenavista, Calape, Carmen, Catigbian, Clarin, Cortes, Corella, Danao, Inabanga, Loon, Maribojoc, Sagbayan, San Isidro, Sevilla ug Tubigon.

Ikaduha nang hugna sa mga hinabang ang among naabtan nga gipamutos sa Kampo Bernido ug Cultural Center sa niaging semana. Bisan kon naproblema sab sa suplay sa bugas gikan sa National Food Authority, ang lokal nga mga kawani sa DSWD nangandam na alang sa ikatulo ug posibleng kataposan nang hugna sa hinabang nga mga pagkaon. Nga gipaabot nga molahutay hangtod nga makabarug na ang mga Bol-anon sa ilang kaugalingong mga tiil.

***

Email: [email protected]