Pagpabarug sa eskuylahan

Nisakay kog bus paingon sa habagatang Sugbo. Way bisan unsang timaan sa linog nga makita sa nasudnong highway gawas sa nabuak nga bahin sa Argao ug sa nidahili nga dagkong bato sa Boljoon. Tungod sa mas dakong kadaot nga nahiagoman sa Bohol gikabalak-an nga mataligam-an ang kadinalian sab sa panginahanglan pag-ayo sa naggusbat nga mga istruktura sa Sugbo.

Sama sa Philippine Science High School Central Visayas Campus sa bukirang barangay sa Argao. Nahimutang tulo ug tunga ka kilometro gikan sa dan maong wa mabantang sa kadaghanan ang dakong kadaot sa eskuylahan. May sukaranan ang kabalaka sa mga tagduma nga di matukod ang hulip nga classrooms hangtod sa gitakdang pagbalik sa klase karong Nobyembre 4.

***

Di na luwas nga gamiton ang building nga nahimutangan sa 12 ka classrooms alang sa 350 ka tinun-an gikan sa Sugbo ug Bohol. Mahimoan og upat ka classrooms ang ilang gym busa walo ka classrooms ang kinahanglang tukuron.

Kay tua man sa bukid, nga ang bugtong patag nga luna way mga punoan sa kahoy, kinahanglan silang magtukod og temporaryong classrooms nga plywood ug sin samtang ayuhon ang ilang administration building ug ubang nangliki nga istruktura. Nagkinahanglan sila og construction materials nga balor og labing menos P600,000. Ang daotang balita mao nga tungod sa burukrasya sa gobyerno mahimong sunod tuig pa magahinan og pundo ug kasugdan ang trabaho.

***

Samang burukrasya sa gobyerno ang nakapalagpot sa eskuylahan ngadto sa bukid. Kay ang Department of Science and Technology (DOST) niinsistir nga matukod lang ang PSHS sa luna nga gipanag-iya o ihatag ngadto sa gobyerno.

Way nanghatag og haom nga luna sa patag. Maong napugos ang DOST pagdawat sa gitanyag nga luna sa bukid ug gitukoran sa eskuylahan. Haom ang nahimutangan sa eskuylahan alang sa pagkat-on apan gitukoran ang mga tinun-an og mga dormitoryo tungod sa kalayo sa dan ug kalisod sa transportasyon. Gani, nagusbat sab sa linog ang dormitoryo sa babayeng mga tinun-an busa kinahanglan silang pangitaan og laing pinuy-anan duol sa eskuylahan.

***

Maong mangahas ko pagtuktok sa imong kasingkasing alang sa mga tinun-an sa PSHS Central Visayas Campus. Nagkinahanglan sila og dinaliang tabang aron nga di maputol sa mas taas nga panahon ang ilang pag-eskuyla. Kon duna kay ikatampo nga construction material o kuwarta hangtod nila ang bisan unsang tabang.

Aktibo nga nanghipos og hinabang alang sa eskuylahan ang mga alumni sa PSHS. Silay labing nahibawo sa kabililhon sa pagpadayon sa edukasyon sa labing maayong mga tinun-an sa rehiyon. Kon ganahan ka nga magpakisayod og dugang detalye unsaon sa pagpadangat ang imong dinalian nga tabang, palihug tawga ang tagduma sa PSHS Central Visayas Campus nga si Warren Cordeta sa 0917-3061477. Daghang salamat daan.

***

E-mail: [email protected].