Suway sa Sugbuanong taxi app
Nalipay ko pagkabasa sa Freeman nga nipirma og kauyonan ang Citom uban sa Sugbuanong kompaniya nga nanag-iya sa bag-ong application nga mohimong mas sayon sa panag-abot sa mga drayber ug mga pasahero sa taxi. Gipahibawo ang Citom sa MiCab nga gigamit nang ilang app sa 500 ka taxi units sa Ken, CTC, Spider, Scorpion ug ubang kompaniya. Busa nakumbinser ang Citom nga pinaagi sa app makahipos og igong kasayuran nga makatabang nila paghimong mas hapsay sa dagan sa trapiko sa Dakbayan sa Sugbo.
May gamay lang kong problema. Dihang gisuwayan nako paggamit ang MiCab app, way natinuod sa tanang nilang gisaad nga kasayon.
***
Nga naglakip sa mosunod:
-Libre nga ma-download sa pasahero ang MiCab app sa bisan unsang Android phone gikan sa Google Play Store;
-Pisliton lang nimo ang menu sa app nga nagkinahanglan ka og taxi;
-Madawat sa taxi driver, nga magbayad og P30 matag adlaw paggamit sa MiCab app, ang mensahe ug ang mapa sa dapit nga imong nahimutangan;
-Madawat nimo ang mensahe sa drayber nga nagpadung na nimo ug ang ngan ug license plate number sa iyang taxi;
-Mobayad ka sa drayber og P5 nga patong sa plite;
-Kapahimuslan ang app bisan wa kay Internet connection pinaagi sa pagpada og text message.
***
Di kang kabasol sa akong kahinam pag-download dayon sa MiCab app gikan sa Google Play Store ngadto sa akong Nexus, usa sa labing bag-o ug maayong Android phones. Giawhag ko sa app pag-log in ginamit ang akong Facebook account. Dayon giawhag ko sa app pagtugot sa MiCab pag-post sa FB ginamit ang akong account. Nanagana ko og diyutay apan nisugot.
Ug ni-crash ang Micab app. Dihang giablihan pagbalik, gipa-log in na sab ko ginamit ang FB. Ug gipa-log in na sab ko ginamit ang FB. Ka-20 tingali nako gipislit og balik apan sa "Log in with Facebook" ra gyod ko kutob.
***
Gitawgan nakong cellphone sa MiCab nga gibutang sa ilang FB Page. Way nitubag. Gitawgan nakong cellphone sa usa sa ilang founders nga si Eddie Ybañez nga nalista sa ilang website. Babaye ang nitubag nga igo lang niingon nga wrong number. Dihang akong gitawgan og usab wa nay nitubag.
Nag-email ko nila sa akong problema. Nitubag dayon si Keith Levi Lumanog, laing founder sa MiCab, nga nag-update pa sila sa sistema samtang nagtaod sa koneksiyon sa 500 ka taxi units. Nisaad siya pagpahibawo nako kon andam nang sistema sunod semana. Nipasalig sab nga ang MiCab app sa iPhone maandam na sunod buwan. Samtang nagsuwat ko ini nanawag si Eddie pagpasabot nga wa siyang katubag kay nagtambong og gradwasyon. Matod niya karong Lunes mahibalik nang ilang app nga hinaot kapuslan na sa mas daghan.
***
Email: [email protected]
- Latest
