Unsa kapaspas ang Coast Guard?

Sunod higayon nga sultihan ka sa kadagkoan sa Philippine Coast Guard (PCG) nga makatabang sila sa mga biktima sa katalagman sa dagat sud lang sa lima ka gutlo, ayaw pagtuo. Aron di ka kapasanginlang madudahon o gahi og ulo, gamita ning akong kasinatian pagbisto sa ilang hambog.

Nakadawat ang DYAB Radyo Patrol og kasayuran gikan sa pasahero sa nasangad nga barko niadtong Martes sa hapon. Gihatag namong kasayuran sa PCG. Naabtan sila og siyam-siyam una nakatino sa panghitabo.

***

Alas-3:08 sa hapon nako nadawat kining text message: “About a hundred passengers were rescued after super shuttle ferry 10 ran aground near pulambato port at around 2pm this afternoon. The ferry left the port at 12:30 pm in pulambato bogo city to palompon leyte. From dyab listener one of the passengers.”

Alas-3:30 sa hapon na kong nakalusot sa mga linya sa telepono sa PCG Cebu Station. Wa pa silang kahibawo sa insidente. Gikuha nilang kasayuran ug nisaad pagsusi sa ilang detachment sa Hagnaya Port sa San Remegio.

Alas-3:36 sa hapon akong gitawgan ang numero sa telepono sa PCG Detachment sa Hagnaya. Way nitubag.

***

Alas-3:37 sa hapon nagpakisayod ko ni Bogo City Mayor Junnie Martinez kon may nakasulti na ba niya sa pagkasangad sa barko duol sa pantalan sa Pulambato. Nisaad siya nga magsusi ug motawag og balik.

Alas-3:42 sa hapon nanawag ko sa PCG 2nd District. Wa pa silay kasayuran sa panghitabo.

Alas-3:44 sa hapon nanawag si Mayor Martinez nako apan wa dayon nako matubag kay gipasapasa pa ko sa mga kawani sa PCG 2nd District.

Alas-3:45 akong gitawgan si Mayor Martinez kinsa nakatino na sa kasayuran. Nipasalig siya nga way pasahero nga naangol sa pagkasangad sa barko. Ug nagpadayon nang pagpasakay sa mga pasahero sa gagmayng bangka nga nibalik nila sa pantalan.

***

Alas-3:53 sa hapon natawgan namo og balik ang PCG Cebu station. Natino na nila ang pagkasangad sa barko apan gipasa mi sa ilang detachment sa Hagnaya alang sa dugang kasayuran.

Alas-3:57 sa hapon gitubag nang telepono sa Hagnaya detachment. Si Petty Officer 1 Romulo Bacalso nipahibawo namo nga ang nasangad nga MV Super Shuttle Ferry 10 may 63 ka pasahero. Wa pa niya matino pilay tripulante. Nahitabo ang pagkasangad 50 ka metro gikan sa pantalan. Nahibaw-an niya nga napawong ang makina sa barko maong gipadpad sa bawod paingon sa mabawng bahin sa pantalan.

Naabtan ang PCG og 23 ka minutos pagtino sa kasayuran ug usa ka oras ug 53 ka minuto human sa pagkasangad. Mas langay hinuong management sa Super Shuttle Ferry nga wa pang katawag 24 ka oras human nipasalig sa pagsusi may barko ba silang nasangad.

***

E-mail: [email protected]