Hakot, suborn ug goryo-goryo

Naalarma si Election Officer Edwin Cadungog sa Cebu City South sa pagsulbong sa gidaghanon sa mga botante gikan sa ubang mga dapit nga nibalhin pagparehistro sa Dakbayan sa Sugbo alang sa piniliay sa barangay ug Sangguniang Kabataan karong Oktubre 28. Gidasonan niya ang mga pagduda nga kasagaran sa namalhin mao ang senior citizens nga nadani sa mas dakong financial assistance nga nauyonan nilang Mayor Mike Rama ug sa mga sakop sa City Council.

Nakadawat og mas makahasol nga kasayuran si Cebu City Councilor Dave Tumulak: May mga molupyo sa pipila ka barangay nga gipamayran ug gipanghakot sa mga politiko ug giparehistro sa laing mga barangay.

***

Nipasalig si Cadungog nga masubli ang tanang bag-ong narehistro nga mga botante sa Election Registration Board (ERB) nga magtigom sunod buwan. Gidasig niya ang tanang politikanhong partido ug ubang nagpakabana nga mga pundok ug mga indibiduwal sa pag-ila ug pagpakita sa gikinahanglan nga mga dokumento sa mga botante nga kuwestiyonable ang mga pinuy-anan.

Nipasidaan si Cadungog sa mga botante nga under oath ang ilang rehistrasyon ug busa mahimo silang ikiha ug masilotan kon mapamatud-an nga namakak sa ilang mga pangangkon. Nitataw hinuon si Cadungog nga ubos sa mga lagda sa Comelec gawasnon ang mga botante sa pagbalhin-balhin ug pagpili asa nga barangay sila magpalista ug mobotar.

***

Pila na ka higayon nga nagkaguliyang ang rehistrasyon sa mga botante. Apan wa pa gyud maleksiyon ang kadagkoan sa Comelec hangtod karon: Apiki ang mga luna sa ilang mga buhatan, nihit ang ilang data capturing machines ug ubang kahimanan, kuwang ang ilang mga kawani ug nagsugwak ug nagkadaghan ang mga botante.

Inay mangita og paagi pagpangita og mas hamugaway nga luna, pagdugang sa ilang kahimanan ug mga kawani ang Comelec niinsistir sa ilang kainutil ug sa matag higayon nagpaabot og lahi nga sangpotanan. Mora silang taphaw nga katabang nga napaso nang wala nga dunggan sa plantsa nga nasaypang telepono nipaod na sab sa plantsa sa ilang tuo nga dunggan.

***

Makapaalarma sab ang pagpa-goryo-goryo sa Comelec sa bantang nga hinakotay ug suburnohay sa mga botante atol sa rehistrasyon sa niaging napu ka adlaw. Ilang lusot mao ang hukom sa Korte Suprema nga ang bisan unsang kalihokan sa wa pang campaign period kabahin sa gawasnon nga pagpadayag ug di maisip nga premature campaigning.

Nakalimot ang Comelec nga sila ang labing gamhanan nga buhatan sa gobyerno sa di pa, atol sa ug human sa piniliay. Mapalihok nilang kasundalohan ug kapolisan ug tanang opisyal ug kawani sa gobyerno pagtuman sa bisan unsa nilang sugo. Maong lisod kaayong ipasabot nganong modayon og pasalipod sa ilang katapolan ug katalawan kon magpatuyang nang mga politiko sa ilang naandan nga pagpamintaha.

***

Email: [email protected]