Dihang boluntaryo pang NBA analyst si Homer Sayson sa DYAB, nagkomedyahay ming magdungan og tiwas sa abogasiya og kon palaran nga maabogado magtukod og law office nga motanyag og dugang pangalagad kay sa pagtambag sa balaod ug pagpanglaban sa mga kaso.
Aron madani dayon ang daghang kliyente bisan mao pay among pagsugod magbutang mi’g dagkong washing machines sa among buhatan. Dasigon ang publiko pagduaw sa among buhatan bawon di lang ang ilang mga problemang legal kon dili hasta sang ilang labada. Ang buhatan among iparehistro isip Sayson & Lastimosa Legal & Laundry Services ug magda sa slogan, "Malabhan Na, Absuwelto Pa."
***
Wa madayon ang among plano apan kumbinsido ko nga mao kadto ang labing talagsaon nga pagsuway paghimo sa abogasiya nga mas makahuloganon sa inadlaw-adlaw nga panikay-sikay sa katawhan. Hangtod nga nakadungog ko sa mas talagsaon nga negosyo ni Cebu City Councilor Gerry Carillo: Pagtumod og ice nga pakapinan og legal advice ngadto sa iyang mga kliyente.
Kun tuohan ang pangangkon ni Carillo, mas malampuson ang iyang business model kay sa amo. Niinsistir siyang daghan ang iyang mga kliyente sa shopping malls sa Metro Cebu. Kinakusgan niyang mga suki mao ang mga imnanan. Nga gawas nga dako og panginahanglan sa ice, salamat sa kontrobersiya nga siya’y nagpadako, mao say labing nagkinahanglan og legal advice.
***
Matod ni Carillo gitambagan niyang tanang suki sa iyang ice sa pagtuman sa tanang panginahanglan sa balaod. Nga mahimong wa tumana sa duha sa labing kontrobersiyal niyang mga kliyente, ang nagtapad rang Kuerks Restobar (kanhi Bakak nga karon gusto nang magpatawag nga Knockbox) ug Mama Maria Pizzeria, nga pulos gipasanginlan nga way business permit.
Pila man sa uban pang kliyente ni Carillo ang kolorum? Nagsusi ba siya unsa sila kalehitimo sa wa pa motanyag sa iyang ice ug legal advice? O bugtong niyang giapas ang ginansiya bahala na kun makatandog sa kaligdong sa iyang buhatan ang kalambigitan sa mga negosyong gipasanginlang way permiso?
***
Si Carillo ang labing nagkinahanglan sa iyang baligyang ice ug pakapin nga legal advice. Tungod sa nagkadako nang lagom nga siya ra say nagpahamtang sa iyang agtang tungod sa pagtagi-tagi pagtug-an sa kamatuoran:
• Sa sinugdanan niingon nga igo rang nakalabay sa dapit nga nahitaboan sa rambol sa mga batan-on;
• Dayon niangkon ang iyang abogado nga nakigtigom diay uban sa iyang mga alyado sa Kuerks; ug
• Karon nikumpisal na nga gawas nga siya’y supplier og ice ang pamilya pa gyod sa iyang uyab ang bag-ong mga tag-iya sa kontrobersiyal nga imnanan.
Hinaot nga may makahunghong ni Carillo nga ang anam-anam nga pagtug-an sa kamatuoran nagkahulogan nga gawas nga nag-usab-usab ang iyang mga istorya nag-anam-anam sab siya og tipak sa orihinal nga bakak.
***
Email: leo_lastimosa@abs-cbn.com