Kang-a sa eskuylahan ug industriya
Sa Kapamilya Overseas Job Fair sa Abellana National School niadtong Mayo 1, nga mao nay ika-26 nga napasiugdahan sa Cebu City government, nga maoy labing unang local government unit (LGU) nga nagpasiugda og mga job fair, kapin sa 20,000 ka bakanteng trabaho ang gitanyag sa 37 ka placement agencies.
Ang Department of Manpower Development and Placement (DMDP) nga gipangulohan ni Fidel Magno nipahibawo nga sa 1,729 ang mga aplikante nga na-interview, 905 ang lalaki ug 824 ang babaye, way bisan usa nga na-HOTS (hired on the spot).
***
Sa tibuok Kabisay-an, diin ang ABS-CBN nitabang sa Department of Labor and Employment (Dole) ug LGUs sa pagpasiugda og local ug overseas job fairs sa mga dakbayan sa Tacloban, Bacolod ug Iloilo, niabot og 8,401 ang mga aplikante nga nakaparehistro, dul-an sa 80,000 ka bakanteng trabaho ang gitanyag, apan 607 o 7% ra ang HOTS.
Ang masulub-on nga mga numero gigamit dayon sa Dole ug Malakanyang sa pagpasigarbo nga mas daghan ang bakanteng mga trabaho kay sa mga aplikante. Kini aron pagdason sa propaganda nga, sukwahi sa reklamo sa mga mamumuo sa kawa o kakuwang og trabaho, daghang bag-ong kahigayonan sa trabaho ang namugna sa malambuong ekonomiya ug ang mga aplikante maoy nagkuwang.
***
Si Magno, ang giilang tinuod nga eksperto sa job fair, nipasabot nga ang labing dakong tumong sa job fairs mao ang HOTS. Nga ang panag-abot sa mga aplikante ug employers sa usa lang ka dapit ug sa usa lang ka higayon mosangpot og dihadiha nga trabaho. Nga ang mga aplikante makasugod dayon og trabaho sa labing daling panahon.
Ang kamenos sa HOTS niadtong Mayo 1 ug sa nangaging job fairs mahimong nagkahulogan nga (1) nasobrahan ka-istrikto ang employers, (2) di takos ang mayoriya sa mga aplikante, o (3) wa pa matapaki ang dakong kang-a tali sa mga kurso sa mga gradwado ug sa aktuwal nga panginahanglan sa mga kompaniya.
***
Silang Magno ug ubang tagduma sa job fairs mosulti nato nga ang mismatch sa katakos sa mga aplikante ug panginahanglan sa mga kompaniya maoy labing dakong suliran. Di ni maayong balita alang sa gobyerno. Ang kapakyas pag-abot sa mga eskuylahan ug mga industriya hangtod karon, nga tulo na ka tuig nang nagtungkawo sa Malakanyang si Presidente Noynoy Aquino, di maayong timaan sa kamatinud-anon sa paningkamot paghatag og trabaho sa katawhan.
Hinaot nga mohunong na’g panghambog si Presidente Aquino nga ang paglambo sa nasudnong ekonomiya nakahaw-as na sa katawhan gikan sa katimawa. Pait nga kamatuoran nga ang kalamboan wa pa matilawi sa kinabag-an. Salamat sa iyang pagluok sa labor ug ubang kabos nga mga sektor ug pagpaburot pagsamot sa mga adunahan.
***
Email: [email protected]
- Latest
