Pagpamasol sa Pasipiko
Siargao, Surigao del Norte—Kon gialimut-an ka sa Sugbo, dali ngari.
Kon magbarug ka sa puting kabaybayonan sa General Luna (GL), usa sa mga lungsod ning matahom nga isla, tugob sa pagpangga kang hapakon sa kusog nga hangin. Kon nakalimot ka unsang dagata ang imong giatubang, pahinumdoman ka sa dahunog sa higanteng mga bawod sa di pa mapusgay sa pag-utlan sa lawom ug mabaw nga bahin sa Pacific Ocean.
Di ni maoy kinakusgang hangin. Samang di ni maoy kinadak-ang bawod.
Moabot sila matag Septiyembre hangtod sa Disyembre. Apan igo nang hupay sa nagtabisay nga singot. 30 degrees celsius ang kinatas-ang temperatura. Samtang makagusbat sa kinakusgang hinapay, ang hangin modalit sa hingpit nga kahayahay.
***
Pat-ak pat-ak ang uwan sa pagtugpa sa among ayroplano dinhi. Matag karon ug unya, bisan taliwa sa ting-init, mokisdom ang langit ug mobunok ang kusog nga uwan. Pahinumdom nga mas daghang uwan kay sa init dinhi. Segun sa katiguwangan dinhi ang Siargao maoy mosugat sa
labing unang uwan ug maoy manamilit sa labing kataposang uwan sa tuig. Tabunok ang ilang yuta. Adunahan ang ilang dagat.
Daghang nagsalig sa ilang panginabuhi pinaagi sa pagpanguma. Daghan sab ang hingpit nga naglaom sa pagpangisda. Ug nanghinaot ang kinabag-an nila nga mas molambo pa ang mabulukon nilang industriya sa turismo.
***
Dugay na kong naglungutlungot nga moanhi. Apan labihang layoa nga paminawon sa Siargao. Maong mas una pa hinuon kong nakaduaw sa Palawan ug Batanes. Labihan nakong kuganga pagkahibawo nga duna nay direct flight gikan sa Mactan paingon dinhi. Ug nga di kaabot og oras ang flight.
Mao nga dihang nangimbitar si Consul Emeritus Arcadio “Dodong†Alegrado, wa nako palabya ang kahigayonan. Namugos ko sa akong gitrabahoan nga moligoy kadiyot aron paglili ning paraiso nga nabantog na sa tibuok kalibotan. Human nabantang ang bakhawan, nga maoy labing lapad sa tibuok nasud, ang “Cloud 9†nga giilang “Surfing Capital†sa kalibotan, mangahas ko pagdapit nimo. Sa di pa magpanon dinhi ang mas daghang turista kay magsugod nang direct flight gikan sa NAIA.
***
Giingnan ming Consul Alegrado nga wa mi laing buhaton dinhi sa mosunod nga tulo ka adlaw gawas sa pagpamasol. Tungod sa dakong kahadlok nga akoy magda og demalas sa ilang lakaw, nikumpisal kong daan nga kataposan nakong pamasol, kuyog sa akong asawa sa Papa Kits sa Liloan sa niaging tuig, kami ra sa kadaghang nangisda niadtong adlawa nga namauli nga way kuha.
Sa bisperas sa among pagsungasong sa lapad nga kadagatan sa Pasipiko, namasol ming daan sa among giabtang bay nga nag-umbaw sa dagat. Dihang nakubitan ang tigbantay, akoy gipalihog ni Consul Alegrado pagbira sa gamayng isda ug gipaletratohan. Nahibawo kong gusto lang siyang masumpa ang akong suwerte sa pamasol.
***
Email: [email protected].
- Latest
