Nganong karon na man lang ayoha ang atong kadalanan nga hapit nang eleksiyon? Nganong wa na man lang ihuwat sa bakasyon sa mga tinun-an ang pag-ayo sa duha ka taytayan sa Mandaue ug Mactan? Nganong gilangkat man ang aspalto sa Mandaue Reclamation Area aron lang pulihan og aspalto ra gihapon?
Nganong gisapawan man og aspalto ang sementado nang daan nga highway sa Mandaue nga wa pa man matapaki ang tinuoray gyong libaungon nga kadalanan? Nganong diretso ra man og trabaho ang DPWH sa way pagpananghid sa local government units ni pagpasidaan sa publiko?
***
Pipila lang ni sa lehitimong mga pangutana sa mga magbubuhis nga nahasol pag-ayo sa pagkabara sa trapiko tungod sa mga proyekto nga gipasiugdahan sa gobyerno. Isip biktima sa kalangay sa pagbiyahe, gusto kong modason sa lapad nga kalibog. Nga wa matabangi sa katak-om ug kanihit og katin-awan gikan sa lokal nga mga opisyal sa Department of Public Works and Highways (DPWH) sa Central Visayas.
Gawas nga bilib kong DPWH Secretary Rogelio Singson. Ug kumbinsido pa ko hangtod karon nga di kawat maoy labing dakong ambisyon sa pamunoan ni Presidente Noynoy Aquino. Gusto kong motuo nga tinarung ang mga proyekto. Wa lay nakatapak sa dakong haw-ang sa komunikasyon tali sa mga tagduma ug sa publiko.
***
Sa tanto nakong pangita og tubag sa mga pangutana ug katin-awan sa mga kalibog, nisangko ko sa website sa DPWH (dpwh.gov.ph). Duna silay mapa sa mga proyekto nga gipatuman sa nagkalainlaing rehiyon sa nasud. Pag-click nako sa Region 7 nakugang ko sa kataas sa listahan sa mga proyekto uban sa ngan sa mga kontraktor, balor sa proyekto, mga petsa sa pagsugod ug paghuman ug ang aktuwal nang trabaho.
Wa ko kahuman og basa sa taas kaayong listahan. Labihang daghanang proyekto alang sa Sugbo, Bohol, Negros Oriental ug Siquijor (balikan to nako kon may igong panahon). Apan way tubag sa mga pangutana sa ibabaw.
***
Maong magpalaban na lang ko ning lindog. Kon makabasa ining mga mga kontraktor ug kadagkoan sa DPWH, palihug pasabta mi. Nganong mas molungtad man og dugay ang semento kong sapawan og aspalto? Nganong gikagis man ang karaang aspalto aron lang pulihan og laing aspalto? Inay nga pulihan sa mas malungtaron nga semento?
Kinsa may nagbuot sa timing sa proyekto? Ang mga politiko? Ang DPWH? O mag-agad kanus-a mapagawas ang pundo gikan sa Department of Budget and Management (DBM)? Semento man o aspalto, unsa man intawoy lahutay sa kadalanan nga wa man lang gihapon pakapini og kanal?
Maayo na lang nga gilihok inay gipasagdan. Ug way ngan ni dagway sa mga politiko nga nagbansiwag sa kasagaran sa mga proyekto.
***
Email: leo_lastimosa@abs-cbn.com