Pagkakita sa mga wa diha
Usahay di kasaligan ang atong mga mata. May mga higayon nga makakita ta og mga butang nga wa diha. May mga higayon sab nga di nato makita ang mga butang nga hagbay rang nabantang sa atong atubangan.
Usa sa mga hinungdan mao nga mas gamhanan kay sa mga mata ang panghunahuna. Kon may mga timaan nga gusto natong makita, usahay magmalampuson ta paglingla sa atong mga mata sa pagkakita og mga butang nga wa diha. O sa mga higayon nga may mga butang nga gusto natong lingiwan, mopaundayon ang atong mga mata pagkabuta sa unsay sukwahi natong makita.
***
Di ko eksperto sa mata. Ni sa panghunahuna. Apan mangahas ko pagsugyot nga usa ka yano nga panagsungi sa mata ug panghunahuna ang hinungdan sa gipaburot pag-ayong kalibog sa Kapitolyo sa Sugbo: Naibanan o nadugangan ba ang kapolisan nga nagbantay sa ganghaan duol sa buhatan ni suspendidong Gobernador Gwen Garcia?
Si Garcia niinsistir nga mas daghan nang mga polis ang naglibot sa Kapitolyo. May mga sakop pa gani sa Special Weapons and Tactics (SWAT) nga nagpagawal sa tag-as nilang armas. Apan si Police Regional Office (PRO 7) Director Marcelino Garbo nipasalig nga mas diyutay na lang ang nahibiling mga polis.
***
Posible kaha nga si Garcia nakakita og mga butang nga wa diha tungod sa kadugay nang natanggong sa iyang buhatan? O gusto lang nga di mangiyugpos ang iyang mga dumadapig inig abot sa higayon nga pul-an nang mga polis sa pagpaatbang ug mogamit na og puwersa pagbunlot niya?
Posible sab kaha nga giduwaan lang siyang Garbo? Nga gipadad-an tinuod og SWAT ang Kapitolyo sa mga higayon nga wa magtan-aw ang media? O makapaalarma lang ang pagka doble sa gidaghanon sa mga polis sa mga oras nga mag-abot sa tugkaran sa Kapitolyo aron magpulihay ang duha ka shift?
***
Sa ilang bahin, ang Sugbuanong mga magbubuhis di angayng magpalipat sa mga unsay makita o di makita sa mga protagonista ning nagpadayong panagsungi sa Kapitolyo. Mas mahinungdanon kay sa lalis sa gidaghanon sa mga polis ang pagtuki sa dakong paghiyos sa P2 bilyones nga kuwarta sa Kapitolyo ug nagbuntaog nga utang sa bayranan sa hotels, ayroplano ug pagkaon alang sa di mga opisyal ni kawani sa Kapitolyo. Labi na kay may kahigayonan nga may maniobra pagpugos nato pagtan-aw sa mga butang nga wa diha aron malipat sa mga butang nga maoy angayng tutokan.
Nipasidaan ang mga doktor nga ang pag-insistir sa pagkakita sa mga butang bisan sa mga ebidensiya nga wa sila diha, usa ka seryusong sakit sa panghunahuna. Kon wa mamakak ang mga hingtungdan, mas duna tay sukaranang mabalaka.
***
Email: [email protected]
- Latest
