Kadaogan ni Noynoy

Sukad sa pagpahibawo sa iyang kandidatura pagka presidente, pila ka adlaw human namatay ang iyang inahan nga si kanhi Presidente Cory Aquino niadtong 2009, hangtod karon nga duha ug tunga ka tuig na siyang naglingkod sa Malakanyang, ang mga kaatbang ni Presidente Noynoy Aquino niinsistir sa orihinal nilang panagana, pagpanaway ug pagpanginsulto niya.

Ilang mga bugalbugal batok ni Aquino atol sa kampanya, nga ang kasagaran napamatud-an nga mga bakak, gisublisubli hangtod karon. Ambot tungod ba kay nakumbinser gyud sa ilang kaugalingong propaganda. O nagdumili lang gyud paggawas sa mingaw ug masulub-on nga langob nga ilang nahimutangan.

***

Ang makabungog nga mandato nga nadawat ni Aquino sa piniliayng presidensiyal sa Mayo 2010 nagmatuod nga gisalikway sa kinabag-an sa katawhan ang sayop nga mga pasangil batok niya. Apan wa ning kapugong sa iyang mga kaatbang pagbalikbalik sa bahaw ug hagbay rang nahalin nga mga pasangil.

Nagduda ko nga kay kuwarta man nilang kanhi Presidente Gloria Arroyo ug mga alyado ang nagpalihok sa gamhanang makinarya sa propaganda batok ni Aquino, wa na magtagad ang mga turutot pagpangita og bag-ong mga pasangil. Nahibawo sila nga lisod ang pagmugna og bag-ong mga bakak. Kay kinahanglang hinumdoman ang tanang nangaging mga bakak aron katuohan ang umaabot nga mga bakak.

***

Makaluluoy ang mga turutot nga hangtod karon moinsistir nga buang-buang si Aquino. Nga hangtod karon makigduwa pa og PSP sa iyang mga pag-umangkon. Kay napamatud-an na sa iyang pakigtagbo sa mga lider sa labing gamhanang mga nasud sa kalibotan ang iyang kamakinaadmanon ug katakos pagtuki sa labing komplikado nga mga isyu sa seguridad ug ekonomiya.

Bisan sa padayong paglambo sa nasudnong ekonomiya, nga gipasidunggan nga usa sa labing baskog sa Asya, may mamasangil lang gihapon nga udto nang momata ug hapon pa lang magbagduy-bagdoy na; nga inay tinud-on ang pagduma sa nasud, gipalabi ang tulo ka bisyo: Pagpanigarilyo, pagpusil-pusil ug pagpanguyab.

***

Human sa mapanagan-on nga pagsugod sa iyang pamunoan, tungod sa kabalaka nga daghang lit-ag ang gibilin ni Arroyo, gipamatud-an ni Aquino karong tuiga ang talagsaong katakos paggamit sa iyang politikanhong gahom ug influencia pinaagi sa pag-umol sa kauyonan sa kalinaw uban sa Moro Islamic Liberation Front (MILF) ug pagpasar sa kontrobersiyal nga Reproductive Health (RH) bill bisan sa pagbabag sa Simbahang Katoliko.

Atubangan sa lapad nga pagduda nga sumbag sa buwan ang iyang kampanya batok sa pangurakot, nga mas una siyang lamyon sa sistema sa di pang kasugod paglimpiyo sa burukrasya, gipapriso niya si Arroyo ug gipalagpot niya si kanhi Chief Justice Renato Corona. Ug atubangan sa pasangil nga kutob ra siya sa Manila, nagsugod nang iyang panilhig sa Sugbo ug ubang lalawigan.

***

 Email: [email protected]