Way halin ang Pasko
Tungod sa kadaghan sa bag-ong gadgets nga nanggawas pangandam sa umaabot nga holidays, nagplano ko pagpangita og usa lang ka pinaskohan alang sa akong kaugalingon nga motagbaw mosunod nakong panginahanglan: Tablet o telepono nga makapadagan sa desktop productivity applications, sama kaggamay sa labing nipis nga Kindle nga mahimo lang isud sa akong bolsa, sama kaabtik sa iPad, sama kaabli sa Android ug sama kabarato sa labing bag-ong tablet sa India (P800 ra kay gi-subsidize sa ilang gobyerno).
Kay lisod man pangitaon ang akong gikinahanglan, mahimong sama sa naandan wa koy mapalit karong paskoha. Savings na sab.
***
Mao ni akong problema sa gadgets karon. Way usa nga makatagbaw sa tanan nakong panginahanglan. Di ko ganahan nga mag-bag maong di ko kada og labaw sa usa ka gadget. Kay limtanon na man ko, kinahanglan nga masud sa akong bolsa aron nga di mawani ni mabiyaan.
Gisuwayan nakong Galaxy S nga telepono: Gamay, gaan, dunay ebook reader, makatubag ko’g emails, maka-surf sa web ug dunay games; apan di kong kahimo og tinuod nga trabaho ug labihang dalia rang mahurot ang bateriya. Ang laptops may productivity apps apan dako ra. Ang iPad ug ubang tablets di sama kamapuslanon sa desktop ug di maigo sa bolsa.
***
Gi-Google nakong kinagagmayan nga laptops. Pulos sila mas dako sa akong bolsa ug kapin sa duha ka oras rang bateriya. Labaw sa tanan, way telepono. Nagplano kong mosuway (sa di pa mopalit) sa dagkong telepono nga gipagawas sa Samsung: Ang bag-ong Galaxy Note ug ang Galaxy S3. Makapanlimbawot hinuon sa balhibo ang presyo (P23,000 ngadto sa P33,000).
Mosuway sab ko sa bag-o ug mas dagkong telepono sa China. May nakahunghong nako pagsusi sa bag-ong niggawas nga sama kadako sa S3 apan tag 7,000 ra. Wa hinuon ko malingaw sa baratong tablets sa China—pamaolan ang imong tudlo una molihok ang screen.
***
Interesado sab kong mosuway sa bag-o ug labing unang tablet nga gipagawas sa Microsoft. Kay naglakip sa tanang productivity apps sa desktop. Nabugnaw na hinuon ko’g diyutay human nakabasa og mga reklamo nga nadaot dayon ang improvised nga keyboard.
Mas dako ang kahigayonan nga mopalit ko’g Chromebook sa Google. Mas gaan kay way native applications, hingpit nga nagsalig sa Google apps sa cloud. Gipasidan-an ko nga maggamit lang kon may internet connection. Way problema. Kay gipaabot man nga mas mobarato pang internet access ug kasagaran sa akong trabaho mahimo ra man kon online. Apan ang nagkamang nga signal sa hapit tanang internet service providers dinhi sa ato mahimong maoy makapakumbinser nako sa pag-ayum-ayom lang una sa karaan nako nga gadgets.
***
Email: [email protected]
- Latest
