Imbestigahon g’yud

Tinuod ba ni nga si Engr. Danilo Gabiana nga kanhi hepe sa Division for the Welfare of Urban Poor (DWUP) nangolekta og tag P5,000 gikan sa matag pamilya diha sa CitiCenter Commercial Complex sa Barangay Kamagayan aron sila maka-avail og housing sites sa dakbayan sa Sugbo?

Nindot ang lakang ni Mayor Michael Rama kay iya kuno nga paimbestigahan si Engr. Gabiana aron sutaon kon tinuod ba ang report o dili. Mireklamo man gud kuno ang taga Barangay Kamagayan nga nagpuyo sa CitiCenter Complex nga gipangayoan kuno sila og advance payment ni Gabiana.

Hagiton nato si Engr. Gabiana nga magpa-interview siya aron tubagon kining maong isyu. Grabeha niini uy kon tinuod man ang gireklamo sa mga lumolupyo sa Kamagayan. Apan basin wala na’y mobarog ninyo ha?

 Apan samtang nalipay ko sa pagpahibalo ni Rama nga ipaimbestigar niya ni sa City Legal Office ug sa Human Resource and Development Office, basin og kutob ra sa sulti ug walay pormal nga kamandoan. Ayaw kalimot mayor!

* * *

Uy, mipasaka na g’yud diay og kaso ang mga nagpuyo sa CitiCenter Complex didto sa Regional Trial Court (RTC) batok ni Mayor Rama ug City Administrator Jose Marie Poblete.

Giawhag nila ang hukmanan nga mo-isyu og kamandoan nga pugngan ang administrasyon ni Mayor Rama nga gub-on ang ilang kabalayan nga anaa mahimutang ilawom sa CitiCenter Complex nga karon iya na sa dakbayan sa Sugbo.

Ang ilang argumento mao nga kon palayason man gani sila gikan sa ilang nahimutangan, angay kuno nga tumanon ang balaod nga kinahanglan nga adunay kabalhinan ang mga apektado nga pamilya.

Na hala, kon unsay anaa sa balaod atong tumanon. Alang nako maayo man ang lakang ni Mayor Rama nga gamiton na kining maong property alang sa publiko, dili kay tugotan nato nga dunay uban nga mangwarta pinaagi sa pagdawat og abang.

Unya moingon mo nga walay binuang nga gihimo sa ubang mga nagpuyo diha ilawom sa kanhi wet market? Tell that to the Marines kay ako mismo nakasaksi dihang mianha ko diha nga wala magpaila.

* * *

Gikontak nako ang tagdumala sa Lola Mary’s Catering Services nga maoy nagsuplay sa mga pagkaon nga gihatag ngadto sa mga polis ug tanod nga mibantay sa menteryo sa dakbayan sa Sugbo atol sa “Kalag-Kalag” sulod sa tulo ka adlaw.

Nindot ang inpormasyon nga akong nakuha gikan sa tagdumala sa maong catering service kay ang matag pack nga pagkaon nga gisuplay nila sa City Hall dili diay P110. Tag P85 ra kuno ang matag pack nga pagkaon.

Sa ato pa, ang bayranan sa dakbayan sa Sugbo alang sa 4,500 ka food packs nga gihatag ngadto sa mga polis ug tanod atol sa Kalag-Kalag mokabat ra og P382,500. Basin baya og moabot ni’g P495,000.

Nahibulong bitaw g’yud ko sa mga opisyal sa kagamhanan kay tuyoon g’yud nila og padakO ang kantidad. Ngano kaha? Kun tag P85 ang matag food pack, dili na lang ko maglangas, apan kon P110 dili g’yud mo kapugong nga magyawyaw kay mahal ra.

Nakakita man gud ko sa mga pagkaon nga gihatag gikan sa supplier ug basi sa akong kwentada, wala g’yud ni makaabot og P110.

* * *

Ang isyu nga wala dayon aprobahi sa Cebu City Council ang gisugyot nga budget ni Konsehal Edgardo Labella makaingon ko nga dili angay’ng basulon ang mga konsehal.

Ang angay’ng basulon mao ang mga tawo nga responsable sa pag-andam sa maong mga dukomento nga dugay kaayo nga nakaduso ngadto sa opisina ni Konsehal Edgardo Labella.

Nahibaw-an na man unta nila nga ingon gayud niini ang himoon sa dakbayan matag “Kalag-Kalag” misumiter unta sila pagsayo sa mga dukomento aron nga maaprobahan kini sa dili pa ang pagpahigayon sa kalihukan.

Apan Oktobre 24 na nga giduso ni higalang Konsehal Labella ang resolusyon nga magpagahin sa P495,000 alang sa pagpalit og pagkaon nga ihatag sa mga mobantay sa sam-ang.

Mao kini ang rason nga nalangan ang pag-aprobar sa budget, apan mas maayo na lang ‘sab kay nasuta nato nga tag P85 ra diay ang kantidad sa food pack.