CCTV nakatabang pagkasikop sa tulisan

CEBU, Philippines — Way swerte ang usa ka 43-anyos nga tulisan kay nadakpan kini dayun sa kapulisan sa Mabolo Police Station 4 sa Cebu City Police Office(CCPO)  pipila ka minutos human niya gitulis ang usa ka tindihan diha sa Sitio Anagan, Barangay Apas, siyudad sa Sugbo niadtong Biyernes sa buntag, Oktubre 4, 2024.

Ang suspetsado mao si Wilson Ignacio Baguio, usa ka vendor ug residente sa Sitio Kanaas, Barangay Guadalupe, siyudad sa Sugbo.

Atol sa pagpanulis, ang suspetsado nagsuot og sweatshirt ug naka full-faced helmet nipalit og softdrinks sa tindahan.  Makita sa video nga sa iyang pagpalit wala niya gitangtang ang helmet ug nagkupot og kwarta.

Apan dihang gitunol na sa tindera ang gipalit nga softdrinks nibunot kini og armas ug mideklarar og tulis. Nisyagit pa ang biktima apan gipahilom kini sa suspek ug gikuha iyang mga cellphone nga Oppo A5 nga nagkantidad og P3,000, Techno5 Park10c nga nibalor og P4,000 ug Realme C13 nga nagkantidad og P3,500.

Human niini misibat dayon ang suspek. Apan paspas nga nakaresponde ang mga polis ug base sa kuha sa CCTV camera duna nay ideya ang kapolisan hangtud nasigpatan nila kini diha sa Sitio San Miguel, Barangay Apas ug gidakop.

Nakuha gikan kaniya ang kalibre .38 nga revolver nga maoy gigamit niya sa pagpanulis apil na ang motor ug helmet niini ug ingon man 15 gramos nga illegal nga drugas nga nagkantidad og P102 mil.

"Wala na daw siya'y ikabayad sa iyang isda pero base sa atong assessment bisyo gihapon sa illegal nga drugas unya naa pud siyay wala mabayri nga utang sa illegal nga drugas," sigon ni Police Major Romeo Caacoy Jr., hepe sa Mabolo Police Station 4.