Ong mobangga nilang Cutie ug Mary Ann

CEBU, Philippines — Gituldukan na sa Liga ng mga Barangay President Franklyn Ong ang hungihong nga matud pa molansar siya pagka-mayor sa syudad human nga hingpit niya nga giduso ang iyang certificate of candidacy pagka kongresista sa Norte Distrito kagahapon, Oktubre 4, 2025.

Ang Partido Barug ug BagONG Sugbu miduso na sa ilang COCs niadtong Huwebes, Oktubre 3, apan giklaro ni Ong nga naulahi lang siya sa pagduso tungod kay kagahapon pa miabot ang iyang Certificate of Nomination and Acceptance gikan sa iyang national party nga Laban ng Demokratikong Pilipino.

“Na-decide sa party nga akong nindot daganan nga makatabang ko kaayo ang Norte Distrito nga Kongresman. So, ako gyud ng gidawat,” suma pa ni Ong.  Unang higayon sab kini nga mahimong kaalyado si Ong ug Rama. Kahinumduman, nagpasilong kaniadto si Ong sa Bando Osmeña Pundok Kauswagan (BOPK).

Tungod niini makaatbang niya silang Konsehal Mary Anne Delos Santos ug incumbent congresswoman Rachel “Cutie” del Mar  nga gihulagway ni Ong nga mga lig-on nga mga kaatbang.  Sa 14 ka tuig ni Ong nga pangalagad gikan sa barangay hangtud nga nahimo siya nga konsehal ngadto na sa pagka-ABC president, nakita na niya ang nagkadaiyang problema sa barangay. Matud pa niya nga sugdan niya pagsulbad ang mga ginagmay nga problema aron nga masubay kun ang tinubdan sa mga dagkong problema sa syudad ug kini masugdan pinaagi sa pagprayoridad sa mga barangay.

“Sulayan gyud nato ang bag-o ba para makita nato ang kausaban. Kay kung dili nimo ilisan, di man sab nimo makit-an ang kabag-uhan”, pulong pa ni Ong. (BANAT NEWS)