Senador Angara mao nay bag-ong DepEd Secretary

CEBU, Philippines — Gitudlo ni Presidente Ferdinand R. Marcos Jr. isip bag-ong kalihim sa Department of Education (DepEd) si Senador Juan Edgardo ‘Sonny’ Angara kagahapong adlawa Martes, Hulyo 2, 2024.

Gianunsiyo kini sa presidente atol sa ika-17 nga Cabinet Meeting sa Malacañang, nga nag-ingon nga gidawat ni Angara ang posisyon.

“Sonny has agreed to take on the brief of the Department of Education,” matud niya sigon sa news release sa Presidential Communications Office (PCO). Si Angara maoy mopuli kang Bise Presidente Sara Duterte, kinsa ni-resign isip Education Secretary niadtong Hunyo 19, 2024 ug karong Hulyo 19, 2024 opisyal na ang iyang pagkanaog.

Sa usa ka pahayag, gipasalamatan ni Angara ang presidente sa pagtudlo kaniya ug nasayod siya unsa ka mahinungdanon ang maong tahas ug iyaha kining kinasingkasing nga gidawat.

Ang senador miingon nga iyang paningkamotan nga buhaton ang tanan ug andam siyang makigtrabaho sa sa tanang sektor, apil na niini  ang pagpadayon sa mga nasugdan ni Duterte.

Si Duterte ni-resign sa tanang posisyon sa gabinete niadtong Hunyo 19, wala siya mohatag og rason apan dili tungod sa "kaluya" kondili tungod sa "concern" o "compassion" sa mga magtutudlo ug estudyante.

Si DepEd Spokesperson Michael Poa mihangop sa pagkatudlo ni Angara ug naghinamhinam na sila pagtrabaho kauban sa bag-ong pamunoan.

Sa laing bahin, nakadawat si Angara og endorsements gikan sa Coordinating Council of Private Educational Associations (COCOPEA) ug Philippine Association of Colleges and Universities (PACU).

Gawas niana, una nang nipadayag si Senate President Chiz Escudero sa iyang suporta kang Angara nga maoy mopuli sa pinakataas nga katungdanan sa DepEd tungod sa taas nga kasinatian sa senador sa edukasyon.

Si Senate basic education panel chairperson Sen. Sherwin Gatchalian mihangop sa pagkatudlo kang Angara ug nagpaabot siyang duna kini matampo sa mga reporma sa basic education sector sa nasud.

Si Angara adunay usa ka halapad nga lehislatibo nga kasaysayan, nga nag-champion sa hinungdanon nga mga reporma sa edukasyon sukad sa pag-apil sa Senado kaniadtong 2013.

Si Angara usa sa mga nagpaluyo sa mga balaudnon sa edukasyon sama sa Universal Access to Quality Tertiary Education Act ug ang Enhanced Basic Education Act of 2013 (K-12). (BANAT NEWS)