Piyansa ni Bong

Segun sa mayoriya sa mga mahistrado (duha sa tulo) sa Third Division sa Sandiganbayan, huyang ang ebidensiya sa prosekusyon maong ilang gitugotan si kanhi senador Bong Revilla sa pagpiyansa og usa ka milyon ka pesos para sa iyang temporaryong kagawasan.

Kon mao, hain na man ang pasalig ni Ombudsman Boying Remulla nga mas lig-on ang mga ebidensiya sa tanang mga kaso nga ilang gipasaka aron nga makabarug sa korte ug andam nang makabuylo dayon ang husay nga dili na kinahanglang mangita pa og dugang mga dokumento ug mga testigo?

Sa iyang bahin, si Remulla naneguro nga lig-on ang ilang mga ebidensiya batok ni Revilla ug ubang mga sinumbong sa nasakpan nga ghost project sa Bulacan. Nagduda siya nga dunay nagmaniobra sa mga huwes aron makagawas si Revilla sa prisohan.

Nipahibawo si Remulla nga makigtagbo siya ni Chief Justice Alexander Gesmundo, nga giila nga iyang classmate sa University of the Philippines College of Law, aron awhagon sa pagsusi sa kaligdong sa mga huwes ug pagseguro nga dili mabulingan ang kabilin ni Gesmundo nga mo-retiro na sa Korte Suprema karong Nobyembre.

Wala mohingalan og mga ngalan si Remulla. Pero ang nitugot ni Revilla sa pagpiyansa mao silang Senior Member Ronald Moreno ug Junior Member Fritz Bryn Anthony Delos Santos. Kansang kinakusgang argumento mao kini:

Dihang gidawat ni Revilla ang kuwarta gikan ni kanhi undersecretary Roberto Bernardo sa Department of Public Works and Highways (DPWH) wala siyay ideya nga kurakuton sa iyang kaubang mga sinumbong nga pulos taga DPWH ang aktuwal nga pagpatuman sa proyekto.

Gisalikway nilang Moreno ug Delos Santos ang mas tarung nga desisyon ni Third Division Presiding Justice Karl Miranda. Kinsa niingon nga si Revilla ang nisugod sa palusot sa DPWH nga niresulta sa pagbayad sa proyekto nga wala matukod. Nipasabot siya nga dili kinahanglang pamatud-an nga aktibong niapil si Revilla sa pagpatuman sa proyekto. Matod niya ang pagdawat ni Revilla sa kuwarta igo nang ebidensiya sa iyang pag-apil sa krimen.

Atong atangan makumbinser bang Remulla si Gesmundo, ug kon may katakos bang labawng hukmanan, sa paglimpiyo sa Sandiganbayan ug ubang mga korte nga tugpahan sa mga kaso sa flood-control scandal.