VP nga trabahante
Unsa man ang nasulod sa ulo ni Bise Presidente Sara Duterte? Nga bisan sa iyang pagka abogada (nga gipanghambog sa iyang abogado sa impeachment trial nga nipasar sa first take ug 80% ang grado) dili diay usa kon dili duha ka kalapasan sa 1987 Constitution ang nahimo?
Gideklarar sa iyang statements of assets, liabilities and net worth nga nanag-iya ug nagdumala og mga negosyo bisan bise presidente na; ug
Gibisto sa Bureau of Internal Revenue niadtong Huwebes nga padayong nagdawat og suweldo isip trabahante sa Davao City Hall.
* * *
Wala pay tubag si VP Sara nganong wala motuman sa Konstitusyon ug ubang mga balaod nga nagsugo niya pag-divest sa mga negosyo. Bisan daghan nang isyu ang gikomentaryohan apil ang paghingalan og homophobic sa kanhi polis nga nipasangil nga nakadawat siya og P2 bilyones sulod sa mga maleta.
Bisan sa ka-abunda sa ilang objections, tak-om ang defense lawyers dihang gipakita sa BIR ang dokumento nga gipirmahan ni VP Sara nga nakadawat og suweldo sa City Hall niadtong 2023 nga P2.36 milyones, nga mao say suweldo sa mayor pa.
* * *
Unsa may iyang trabaho sa City Hall? Adviser ni Mayor Baste Duterte? Mao bay nagtambag nga iyang kompaniya, Gencorp Industries, maoy padag-on sa minilyon ka pesos nga catering contract?
Peligro kon moingon si Baste nga, sama sa pagpanag-iya ni VP Sara sa Gencorp, wala sab mahibawo nga naa sa payroll sa City Hall ang iyang maguwang. Kuyaw kon sama sa panghunaw sa iyang bank accounts dili na sang kahinumdom si VP Sara nga doble iyang suweldo.
* * *
Dili kini balido nga lusot pero silang VP Sara ug Baste dunay giliwatan. Ilang amahan, dihang mao pay hawod sa City Hall, gibadlong sa Commission on Audit tungod sa kadaghan sa ghost employees nga nakapilde sa panudlanan og kapin sa bilyon ka pesos. Apil sa nangangkon nga ghost employees mao ang mga berdugo sa Davao Death Squad nga silang Arturo Lascañas ug Edgar Matobato.
Naanad ba lang ang mga Duterte (gikan sa amahan ngadto sa mga anak ug mga apo) nga tilukon ang tanang posibleng mga paagi sa pagpangawat? O kumbinsido nga kublan sila sa balaod hangtod sa hangtod?
* * *
- Latest
