Silotan gyud!

Angay'ng duna gyuy manubag ug masilotan sa pagpabaya nga ang 8,900 ka kilos nga bugas-humay, nangadaot na lang didto sa lungsod sa Bantayan, Cebu nga wa kapahimusli?

Nakapanglingo-lingo tawon ang mga kawani sa Commission on Audit (COA) nga nagtan-aw kay ang 178 ka sakong bugas nga tag 50 kilos kada sako, nangadaot na lang sa bodega.

Gikan pa kuno ni sa previous administration. Ang pangutana:

1.) Kanus-a kini na-turn over ngadto sa present administration? Human ba gyud sa election niadtong 2025?

2.) Gisusi ba atol sa pag-turn over kon maayo pa ba ang maong mga bugas, ug "fit" pa kaonon sa mga tawo?

3.) Nganong wa man kini kapahimusli? Para panghatag ra ba ning mao nga bugas, o kaha ibaligya ba og barato?

Ang mga kawani sa COA ug National Food Authority (NFA) miingon nga di na gyud maayong kan-on sa tawo ang maong mga bugas.

Tungod niini, nahukman nga ilubong na lang ang bugas. Hahay, kaanugon tawon nga wa gyud kini kapahimusli.

Samtang daghan karon ang naglisud sa kapobre, unya daghan diay'ng bugas ang wa ra magamit.

* * *

Tan-aw nako, makonbikto gyud si Vice President Sara Duterte sa giatubang niyang mga kaso nga gihimoan karon og impeachment trial. Abi ninyo og ngano?

Katorse na ka senador ang alyado karon sa administrasyon human nga milayat si Senador Mark Villar paingon sa kampo sa majority bloc. Siya na ang ika-14 nga maoy makapakonbikto ni Sara.

Samot na kon mokalit lang pagpauli dinhi sa nasud si Senador Loren Legarda nga tua pa sa France, apan matud pa mitug-an kang Senador Ping Lacson nga nasayop siya pag-ipon sa oposisyon.

Si Loren nalakip sa 10 ka senador nga alyado sa oposisyon, apan ang uban niini nga mga senador napriso ug ang usa nagtago-tago kay hadlok nga dakpon sa NBI.

Gibutyag ni Sara nga giingnan siya sa iyang inahan nga pabalikon na lang sa Davao, ug ang iya na lang mga igsuon maoy padaganon nila og pwesto sa nasudnong kagamhanan.

Pero kon konbiktohon si Sara sa Impeachment Court, ang silot niya matangtang siya pagka vice president ug pun-an pa og penalty nga dili na siya makahupot og bisan unsang katungdanan sa kagamhanan.

Sa ato pa bisan mayor sa Davao dili na siya makahimo paglansar. Kon ang mga igsoon ni Sara ang hisgotan, tan-aw nako maglisud kini pagdaog kon maoy padaganon pagka presidente.

Makita man gud sa mga tawo nga sila mga isogon, ug daghang patik ang lawas. Aw, wa may nagpugong kanila kon modagan gyud, basin nga makumbinser ang katawhan.