Mandaue Congressional Cup malampuson nga mi-arangkada

CEBU, Philippines — Ang labing unang Mandaue Congressional Ouano-Dizon Cup misikad na uban ang usa ka masipang buto niadtong Domingo, Hunyo 23, didto sa Barangay Opao gymnasium.

Si Mandaue City Lone District Rep. Emmarie  “Lolypop” Ouano-Dizon ug ang bana niyang si Opao Barangay Captain Nixon “Jojo” Dizon maoy nangu sa pormal nga seremonyas sa pagbukas uban nilang Provincial Board Member Jonkie Ouano sa Sixto Distrito sa Sugbo, mga konsehal sa dakbayan nga sila si Nerissa "Inday Nery" Soon-Ruiz, Atty. Joel Seno, Cesar "Ting Sol" Cabahug, ug Andreo "Anjong" Ouano Icalina, ug Consolacion councilor Alfie Ouano.

“Kani nga liga open sa tanan. Walay color, walay pili kay atong katuyoan kita tanan malipay, malingaw, ug mapakita inyong abilidad ug katakos sa pagduwa,” matud pa ni Ouano-Dizon, nga nagtoo sa sports nga usa ka gamhanang puwersa nga makahiusa sa usa ka komunidad.

"We have seen through many sporting events around the world kon giunsa sa sports ang paghiusa sa katawhan ug nalipay kaayo ko ganina nga ang tanan are supporting and cheering for a common love, interest and goal,” dugang pa ni Ouano-Dizon.

Dul-an sa 1,800 ka mga atleta nga gikatag sa 115 ka teams gikan sa 25 ka mga barangays sa siyudad ang misalmot sa usa ka bulan nga paugnat sa kusog nga naglangkob og men's ug women's volleyball ug juniors, seniors, ug 40-above categories alang sa basketball.       

Ang mga partisipanteng barangay mao ang Alang-Alang, Banilad, Basak, Cabancalan, Cambaro, Canduman, Casili, Casuntingan, Centro, Cubacub, Guizo, Ibabao-Estancia, Jagobiao, Labogon, Looc, Maguikay, Mantuyong, Opao, Pagsabungan, Paknaan, Subangdaku, Tabok, Tingub, Tipolo, ug Umapad.

Si Jonkie Ouano, ang overall director, maoy mideklara sa pormal pagbukas sa torneyo.

Si Zylle Cabellon, nga varsity  player sa University of the Visayas (UV) Green Lancers ug Sangguniang Kabataan (SK) Councilor sa Banilad, maoy nangu sa oath of sportsmanship. Human niini, ang garbo sa Mandaue mibitbit sa Flame of Sportsmanship nga gidagkotan ni volleyball superstar Cherry Ann “Sisi” Rondina.       

Sa makapadasig niyang mensahe, si Rondina, nga kasamtangang nagduwa uban sa Choco Mucho Flying Titans sa Premier Volleyball League (PVL), mibatbat ngadto sa mga atleta nga ang usa ka damgo tataw nga mahatagan og katumanan kon  ang usa ka tawo magkugi ug magpursige lang  gyud sa kinabuhi.